如意算盤

這天，我帶 Jayson 到爺爺公司，送一部新的 iPad 給爺爺。自從上次他入醫院，已經說要買一部給他。好讓他用來上網之餘，亦可打發一下時間。

在途中…

「Jayson，今日我哋去送部 iPad 俾爺爺。爺爺老啦，賺唔到錢。所以爸爸買件玩具俾佢，氹下佢開心。」

「咁您幾時買部 iPad 俾我呀？」Jayson 細聲地問。

「您咪有大把玩具囉！！！」差點激死我啦！

「…」Jayson 無言以對。

我突然心生一計…

「所以第二時爸爸老咗，賺唔到錢，您都要買玩具送俾爸爸呀。知唔知道？」心裡不禁叫了一聲：「絕呀…」。這時就是灌輸「正確」的孝順觀念的大好時機。

「哦…」然後他續說：「但如果第二時您上咗天堂，我會好好照顧您部 iPad 㗎啦。」

我的如意算盤「呯」一聲跌在地上。他認真誠樣子，我的眼眶立即注滿淚水。左眼的是感動的淚水，右眼的是悲哀的淚水。自從他知道人會死之後，我的生命仿佛越來越短暫…。

「哦… 真係多謝您呀。但喺爸爸老咗但又未上天堂之前，您記住要買玩具俾爸爸呀！」

「…」他心裡不知在想甚麼，然後問：「咁可唔可以帶 iPad 上天堂㗎？」

「哈哈哈… 上咗天堂就唔洗用啲咁嘅嘢㗎啦。」希望天堂不是用 Android 的吧…

~ Lindberg