爆呔事件

星期六晚上，我車住自己及 Mavis 一家返屋企。當出咗東區海底隧道，轉上東區走廊嘅時候，架車突然有啲震。而且仲冇乜力，踩油都冇乜反應。心諗：死喇，莫非七月真係唔好出夜街…

第一時間，我以為副引擎有問題，但又唔見有問題指示燈。見架車都仲行得，於是就慢慢行到目的地附近。落車一睇，竟然係爆呔！ 

平生爆過兩次呔。第一次係喺我小學嘅時候。學校旅行途中，我條短褲爆到變咗條迷你裙。當我見到最後一條線將近斷之際，我好努力地用雙腿夾實最後一絲嘅希望，但最後都改變唔到爆呔嘅命運。雖然今次情況有啲唔同，但沈重嘅心情都係一樣。

當我見到咁嘅情況，因為當時已經接近 11 點，所以我叫車上嘅人自行回家。之後就打電話求救。一來已經好攰，二來自己未試過，所以都係搵人幫手穩陣啲。$350 就當係上寶貴嘅一課啦。

大約半個鐘之後，拖車就到場。我同師傅摸索咗一陣，先搵到條士啤呔。原來我係冇辦法自己換呔㗎，因為個「積」唔見咗！！！買車嘅時候，我記得只有檢查過有冇士啤呔。真係冇乜印象個「積」喺邊。唉… 

可能因為我爆咗之後仲行好長路程嘅關系，條呔都爛得幾厲害。無發生意外真係謝天謝地！但點解會爆呔，真係一個謎。

師傅非常專業，䁪下眼已經幫我換好。士啤呔嘅感覺真係非常樣衰，但冇辦法啦… 換完之後，佢叮囑我唔好開得快過 80km/h。當我見過鬼都仲唔怕黑咩！

~ Lindberg