Chok 男 Chok 女 Chok 薄餅聚會 實況

前個星期日，「Chok 男 Chok 女 Chok 薄餅聚會」順利舉行。一眾網友湧躍出席，可謂盛況空前！而為咗配合主題，一班小朋友都非常落力喎！ 

「兄弟姊妹們，Chok 呀！」

首先要鳴謝各方贊助商，包括：Oilatum、Stiefel、Mentholatum 為聚會贊助禮品，Fat Angelo's Italian Restaurant 提供場地及美食。最重要，當然係主辦單位：「七師奶親子娛樂製作株式會社（Seven Sea Lions Entertainment Corporation）」。（如果有啲時間的話，我打算用七隻肥肥白白嘅海獅（師奶人）做番個商標。如果我仲有命的話…）

贊助禮品包括：

• 曼秀雷敦 SKIN AQUA SPF50 PA+++ 防曬補濕乳液，可以阻隔UVA UVB，滋潤保濕又抗光老化；
• 曼秀雷敦 Kids SPF60 小兒戶外防曬乳液，勝在不含色素、酒精、礦物油。及一大枝曬後蘆薈啫喱，為曬後皮膚補水舒緩；
• 另外還有 Stiefel 嘅 AI SUN CREAM，抗氧化兼低敏，不含類固醇，最重要是不會阻塞毛孔，防水防汗。

以上每件都係炎夏嘅恩物。另外 Oilatum 系列就適合濕疹或敏感 BB既皮膚，舒緩痕癢及刺激肌膚問題，BB潤膚沐浴油能與水混合，被皮膚吸收，不會立痴痴；潤膚膏不含香料及色素，待夏天過後入秋時使用就最好不過喇。

亦多得公關公司嘅 Shirley 出手相助，是日仲有一個終極大抽獎環節。獎品係由 Nescafe 送出，價值 HK$1,990 嘅 Nescafe Dolce Gusto Product 專業咖啡機一部連飲品膠囊兩盒。呢部機 Jayson 媽公司都有一部。即使安在家中，都可以炮製 Cappuccino、Latte、Mocha 及 Espresso 等。保養清洗都好容易，真係好適合忙碌嘅都市人。非常感激 Shirley 嘅幫忙。

而「七株社」都唔弱喎，精心「淘」嚟一大堆禮物。雖然唔係乜嘢貴嘢，但真係件件精心挑選。活動之後，我哋有人因為好鐘意啲禮物，番去自己去補購添！

享用過豐富午餐之後，我哋就開始我哋嘅薄餅製作工作坊。

今年係第二年玩整餅，好多小朋友都已經知道點樣玩。 

「我喺 Junior Master Chef！」

唔夠秤嘅小朋友，我哋準備咗一個波波池（多謝 Jayson 姨慷慨借出）俾佢哋玩。

當薄餅送入焗爐之後，就係正式玩遊戲嘅時間。首先，我哋俾小朋友一個機會介紹下自己。

「Chok 王，唔好係咁搶鏡！」

第一個熱身遊戲係「傳彈彈波」。用匙羹傳波仔，由頭一個小朋友傳到最尾一個，限時鬥多。除咗考驗定力之外，仲考驗小朋友嘅合作能力。

第二個遊戲係「穿氣球圈」，考驗大家嘅靈活度。

「米爺，加油呀！」後面嘅 Eason 好肉緊地吶喊。

跟住就係一個大家細個嘅時候一定有玩過嘅遊戲：「世界之最」。邊個個口最大？答案很明顯吧…

仲有「收買佬」遊戲，俾父母們都有參與嘅機會。

最後一個遊戲，就係玩「爭櫈仔」。好奇怪，呢個遊戲我竟然一張相都冇影過。可能因為呢個遊戲實在太過激。爭唔到櫈仔輸咗嘅小朋友，都會喊住離場。大家都忙住安慰小朋友。不過正正係呢啲機會，先可以用嚟教育一下啲小朋友呀嘛。

玩完之後，薄餅就剛好出爐！

集體遊戲完咗，但「七株社」仲額外安排咗一個人人有得玩，個個有獎贏嘅遊戲。就係「Bingo」喇。「Bingo」上面每一個公仔，都係製作單位精心設計。好玩之餘仲好有教育意味添！

咁多獎品，贏咗都唔知選擇邊份好。

到節目嘅尾聲，就係終極大抽獎… 贏得咖啡機嘅幸運兒就係… Eason 媽！真係恭喜恭喜！

（因為 Eason 媽冇寫網誌，所以好友白雪會親自試機，然後寫三萬字報告，跟大家分享一下。我哋會熱切期待佢嘅分享。）

今年出席嘅人數勝往年。當然要嚟一幅大合照留念啦。場面真係好勁呀！！！

因為網友眾多，如有待慢之處，敬請原諒！希望明年會再見到大家啦！今年冇嚟嘅，明年一定要到呀！！！

~ Lindberg