韓國之旅：第二日傳統韓燒篇

離開咗首爾搭，家姐安排咗到一間歷史悠久嘅餐廳，享用一頓傳統嘅韓式燒烤午餐。

餐廳名字叫做 Samwon Garden（三元花園），開業三十幾年。據稱店主嘅女，仲係前職業高爾夫球好手朴芷垠（Grace Park）。成間餐廳可以坐 1,200 人！超誇張地大！分新舊兩翼。舊嗰邊裝飾得好有古色古香，而我哋就被安排到新翼嘅大房，非常舒適嘅呢。

可能因為導遊已經預早幫我哋打電話通知咗餐廳，枱面已經放滿咗前菜小食。但除此之外，只見枱面上有一個洞，打開下面見唔到有爐具。雖然大家已經好肚餓，但當遇上有 Wifi 嘅地方，任何嘢都可以拋諸腦後，上網最緊要…

枱面除咗多碟（唔飽肚嘅）前菜之外，就只有一碟洋蔥「沙律」。侍應小姐淋上辣汁，色彩非常鮮豔。但對於一個唔食蔥嘅人，叫我點放入口呢。阿媽成日話我，食蔥先會聰明㗎。可惜對於一個自問已經好聰明嘅人，呢句說話只會帶來反效果。

不過除咗大褸之後，真係有啲飢寒交迫。再冇嘢落肚的話，我唔會排除食咗「家明」。所以我嘗試放一條洋蔥入口。辣汁嘅味道非常醒神，新鮮嘅洋蔥清新之餘，佢嘅辣味仲被辣汁蓋過咗，剩底嘅只有洋蔥嘅甜味。貶下眼，整條洋蔥沙律俾我食哂。好神奇呀！
等咗一陣，房間外面轉來擾攘嘅聲音。嘩…

唔怪得之冇爐具啦！原來係用碳火！喺香港係冇可能見到嘅事。我對餐飯嘅期望又提高咗。

「熊熊聖火…憐我苦痛多…有得食未呀？！」 

碳爐除咗可以用嚟煮食，亦都可以用嚟取暖。

家姐隨意叫咗啲食物。首先有一班「牛魔王」喜歡嘅燒牛肋骨。

碳火燒自然有碳火嘅風味。不過韓國牛肉有啲筋，唔算非常好食。反而香港食到嗰啲牛肉會嫩啲。

反而平啲嘅燒牛肉仲好味。佢個汁真係可以餸幾碗白飯！雖然牛肉比較瘦，但都唔會韌。大家都覺得比燒牛肋骨好味。

生蟹！我唔知呢個叫咩名堂，但對於一個乙型肝炎帶箘者，感覺就好似超人見到氪氣石一樣。大哥自持前排中過甲型肝炎唔會再中，好勇敢地食咗一舊。據形容，滑潺潺蟹肉，隨住辣汁滑入口。味道幾好，但即使有辣汁「殺箘」，大家都無謂「冒險」。佢問過侍應之後，就放喺爐上燒一舊俾我。但燒一舊咁「立體」嘅蟹肉係好需要時間。燒咗好耐之後，我一口咬落去都仲係未煮熟。半生熟嘅蟹，感覺非常曖昧。

石頭飯（粥）。米係用糯米，好香好煙韌。雖然之前啲嘢咁濃味，都仲可以清楚聞到啲飯香。食哂啲飯之後，仲可以倒啲熱水入去，將飯焦煮食粥。冬天食番碗都幾舒服。

甜品係紅豆粥。起初我以為係紅豆沙，心理上覺得佢係甜嘅。其實濃濃嘅紅豆粥係鹹鹹地嘅。據說韓國人傳統會在冬至時煮嚟食。

可能言語不通嘅關系，即使有導遊嘅翻譯，點菜嘅數量重複咗。雖然最後都食得哂，但埋單都幾嚇人，每人平均要大約港幣三百大元。而且呢到除咗牛肉之外，竟然冇其他肉類選擇！冇豬冇雞！搞到細家姐要帶唔食得牛肉嘅姪女去到另一間餐廳食。真係比較遺撼。

午飯後，我哋去番餐廳外面嘅亭園行下。呢到除咗有水池瀑布裝飾，仲有設備供客人戶外燒烤。當日較早嘅時候，呢到就舉行咗一場婚禮。非常有氣勢呢！

成班細路來一張合照先！

由細至大再來一張！

水池都凍到結咗冰。班大細路搵啲石頭掉落水池上，「測試」一下冰塊嘅厚度。作為長輩，好應該喝止佢哋。但事實上，當然係趁未俾人發現，叫啲細嘅去搵舊再大啲嘅石頭嚟啦。

影咗一陣相，突然落起雪來！大家都興奮莫名。我哋係第二次見落雪。好多年前嘅蜜月旅行，我哋上雪山遇過一次。嗰次好大風雪，乜都睇唔到。除咗唔覺得靚之外，仲俾打到有啲痛添。今次見啲雪慢慢飄落嚟，真係好靚呀！

喺我手上，仲俾我搵到一朵完整嘅雪花。真係好靚喎！

「爸爸，雪呀！」小小嘅公園變成咗飄雪樂園，大家都玩到唔捨得走。

「啲雪唔食得㗎！！！」雖然係咁講，但自己都忍唔住學班細路向住個天張開口。好味…

食飽飯之後，我哋就去行街和睇表演。

（待續…）


~ Lindberg