聖誕曲奇餅

今個聖誕，我哋想學人整曲奇餅。於是一早買咗一盒「無印聖誕曲奇餅」，試驗一下。

其實曲奇餅好易整，我主要係貪佢方便，而且有個模。首先牛油要放喺室溫，然後搓軟。

加糖，然後加入餅粉搓混。

跟住嘅步驟無手影相… 主要係將舊野搓成球體，然後喺保鮮紙上，壓成 5mm 薄片。再蓋上保鮮紙，放入雪櫃。呢個步驟好重要，因為等大概十五分鐘之後，曲奇餅底先會硬番，容易切割。

跟住就可以用模具，切出一塊塊嘅曲奇餅。放入焗爐，焗至金黃色。

因為我壓得太薄，所以做到好多塊曲奇餅。最後用剩嗰舊，我就隨便壓平放埋入去，命名為 Snowman（屎撈人是也…）。

薄薄嘅曲奇餅，唔洗十分鐘就可以出爐。曲奇餅底加入谷古粉，就會做成咖啡色嘅曲奇餅。將兩隻色嘅餅底配合，就可以做出唔同花紋嘅曲奇餅。

最後就嚟到最麻煩嘅步驟，要用糖霜畫上圖案。跟據指示，只要加少許奶入糖霜粉，就可以放入紙袋，擠出嚟畫圖案。點知原來係超難！用佢個份量，會做出一舊石頭，根本擠唔到出嚟。如果加得太多奶，又會變得太稀。

道理上應該有三隻顏色嘅圖案：紅、白、啡。紅色係要加入士多啤梨粉末，但啲所謂粉末一舊舊咁。即使跟指示做，用手指壓碎，最後都係擠到我「啤」一聲咁。白色加得太多奶，失敗！最後只有咖啡色成功。唉…

經過今次經驗之後，我上網搵咗一個不錯嘅薑餅人食譜。原來要做糖霜圖案，都有一個糖霜食譜，並非就咁加奶咁簡單。但怕麻煩的話，都可以買現成嘅糖霜嚟畫。

不過可能因為吸咗些少水氣，畫上圖案嘅薑餅冇咁脆。好在呢個食譜唔會好甜，而且有清新嘅薑味，真係可以食到停唔到口！

~ Lindberg