韓國之旅：初到貴境

今次韓國之旅，真係可以稱得上係「寒國之旅」。真係從未試過去啲咁凍嘅地方。當年初屋企人話要聖誕後一齊去首爾嘅時候，Jayson 媽十萬個不願意，因為怕 Jayson 會冷親。但經阿哥家姐不停遊說，加上我太少機會陪屋企人，所以我最後都堅持要去。結果，凍係真係凍啲，但真係玩得好開心！

「忌廉哥呀！」（呢間旅行社喺啲咁嘅地方賣啲咁嘅廣告真係收效。）

既然要去，就要好好準備一下。禦寒衣物方面，即使未算係滑雪級裝備，但已經買都買到窮！除此之外，聽朋友嘅提點，因為暖氣好乾燥，護膚保濕用品都帶咗一大堆。

抵埗已經差不多係晚上六點，我哋坐機場巴士去酒店。因為言語非常不通，所以搵到車站嘅時候，剛剛走咗一班車。行出室外感受一下零度以下嘅氣溫，初初都覺得好興奮刺激，但企多一陣就知味道。

既然下一班巴士要等二十分鐘，Jayson 就話要去買個冬甩醫肚。

「我最鐘意朱古力！」

大約四十五分鐘嘅車程，就到達我哋住嘅酒店：「Lotte Hotel Seoul」。上一次嚟首爾（當時叫漢城），已經係二十年前嘅事。印象中比香港落後好多。二十年過後，香港好似都係沿地踏步，人哋就跑過頭好遠好遠。唉…

酒店新翼感覺好高級，櫃台設置喺 14 樓。據稱旅行社幫我哋要求咗高啲嘅層數，入到去又真係唔錯喎！

其實係因為我哋決定得太遲，最後要俾貴機票及房間。但為咗跟屋企人相聚，冇計得咁多啦。

Jayson 見到張大床就最興奮。而我就對個廁所比較有興趣，因為嚟緊五晚都會喺度「辦公」㗎嘛…。

喺入酒店嘅時候，我哋見到地上有啲雪。Jayson 好期待落雪，更期待啲家姐嚟同佢玩。

窗外嘅景色都好靚喎（之後元旦仲發現有煙花睇）！呢間旅行社果然安排得唔錯。

當我哋還未安頓好，大家姐就打電話嚟。佢哋早兩日已經到咗韓國，呢晚大部份人都出咗去食飯行街，未返酒店。於是，我哋就自己去咗酒店附近嘅明洞食晚飯。

我哋選擇咗一間人比較多嘅麵店，打算隨便叫個餃子麵、石頭飯、壽司卷（？）。誰知入到去先見到枱面嗰張落單紙，冇一個字睇得明！但好彩佢有一份翻譯咗成英文嘅餐牌。不過我哋都要慢慢對番個名，然後先可以劃落張單到。正當對到眼都花嘅時候，店員行過嚟，用普通話幫我哋。不禁喺心裡講咗句：「識得中文唔早講！」

餃子麵嘅餃子好味。兩粒唔辣、兩粒辣。壽司卷入面有牛肉，跟五色配搭 （蛋、紅蘿蔔、節瓜等等）。石頭飯都好味。Jayson 每樣都食少少，之後我先落辣，享受一下真正韓國嘅風味。雖然只係一個普通嘅小店，但味道都好唔錯。正當感動可以隨便都食到好味嘅食物之時，其實我仲未發現，呢個只係惡夢嘅開始…。

因為遲出門嘅關系，食完晚飯大概已經十點。大部份店舖已經關門。我哋於是就隨便四圍行下街。

俾我見到有小食賣，當然要入啲貨啦。實行手指指，樣樣試啲。

魷魚好味，栗子好大粒但味道普通，燒八爪魚乾超好味！可恨冇買啤酒呀！

可能身體未真正感覺到啲氣溫嘅關系，第一晚又唔算好凍喎。之後去咗便利店，買咗幾個「希望唔辣但原來點都係辣」嘅杯麵。網友提及嘅香蕉牛奶，呢晚只係搵到士多啤梨版。都幾好味喎！

韓國比香港快一個鐘。返到酒店，洗完白白冇嘢做，就最好上網做功課啦！嘩哈哈哈哈…

舟車勞頓，Jayson 好快就瞓著。跟佢一齊瞓，最麻煩就係佢唔鐘意冚被冚到腳。好彩房間有暖氣，溫度設定咗喺 25C。於是佢就瞓喺被上面，然後冚上大浴巾。如果唔係咁，我哋就一定會凍死囉…

而我去韓國之前已經有啲感冒喉嚨痛。就係靠呢兩支嘢，先確保我有覺好瞓。

 （待續…）

~ Lindberg