半世紀老店：美都餐室

以前好多時幫老豆手，落上海街買機械零件，或者去百老匯電影中心睇戲，都會經過呢間餐室。每次都係匆匆而過，都無諗過入去坐下。呢晚行開佐敦，專登落去試一試。

美都餐室
地址：油麻地廟街63號地下
電話：2384 6402

通常我寫「食」之前，都會睇下其他人點樣寫。希望唔好帶過份嘅偏見。今次睇番人地寫嘅食評，都唔知係佢地唔好彩，定係我好彩。間野無佢地寫得咁差啫。

可能大家嘅要求唔同。其他人係聽完人地嘅推崇之後，望名而來，失望而去。而我地就以平常心，踏入呢間舊式冰室。一入到去，下層都幾殘舊，不過都幾乾淨。收銀叫我地上二樓，經過一條長長嘅樓梯，真係別有一番景象。十足十一間老牌餐室（天啊…，人地本身就係一間老牌餐室！）。咁熟口面，咪係電視劇《孖仔孖心肝》入面見過囉。

星期二晚上嘅七點，餐廳冇乜人。只得一檯後生仔女，好明顯係慕名而來，不停影相。因為冇乜人嘅關系，冷氣覺得特別凍。我地隨便搵咗一個窗口卡位坐。腰圓背厚，唔坐卡位坐邊呀。

窗口望出去，見到廟街擺賣嘅攤販。

之前聽講話紅豆冰好飲，我地就叫咗一杯。我唔係太鐘意紅豆冰，因為我覺得要夠甜先好飲，但甜又會好肥。所以我自己叫咗一杯凍檸樂（仲肥…）。紅豆冰夠甜，紅豆軟硬適中，好味。

一眼掃過牆上嘅餐牌，我睇中咗涼瓜牛肉飯。食涼瓜解下毒好呀。以前 Jayson 媽都唔食涼瓜。但正所謂嫁雞隨雞，嫁著個肥佬食住走。所以佢依家都會被動地食。

呢個涼瓜牛肉飯，涼瓜嘅厚薄剛剛好，炒得唔會太生太熟。入口脆得嚟又吸到其他野嘅味。普通一個家常菜講唔上超水準，但都好好味。

原來呢到出名焗飯。原本 Jayson 媽諗住叫個正路嘅焗豬扒飯，但見餐牌上有個焗排骨飯，於是就叫嚟試下。焗排骨飯係類似生炒骨，炸完啲排骨放上炒飯面，放上茄汁，然後攞去焗。汁嘅味道唔算濃烈，整個飯好香，好好味。雖然焗過，但炸排骨仲有啲脆。唔錯。

不過唔好因為佢係老店嘅關系，就以為價錢會平。以上嘅野加埋都要 $114。啲野食未至於好食到要專登坐車去食。可能因為咁，啲人睇完雜誌去食，就感到失望。不過如果行開行埋，相信我都會再去過。



~ Lindberg