三歲後的第一天

今天接放學的時候…

「爸爸，我行呀。」

「Jayson，您好乖呀！真係三歲唔洗抱喇？！」我們經常說，到了三歲就不抱。

「唔係呀，我鹹呀。」原來我聽錯。

「鹹？！」莫非遺傳了我…「唔係呀。您好甜呀。」

「唔係呀，我喊呀！」

「吓？！您喊？！點解喊呀？」忽然覺得自己有點像聾貓…

「有人推我，坐咗喺我隻腳上面，所以我喊呀。」

「吓？！咁仲有冇痛呀？Ms. Fong 有冇錫番呀？」

「冇呀…」

「係呀… 等爸爸錫番，一陣話俾公公知，叫公公都錫番啦。」

行到斜路，有猛烈的太陽曬著…

「我攰呀。要抱呀。」

「好喇，見您整親隻腳，我抱您一陣啦。過咗前面條馬路要自己行㗎喇！」

過了馬路後…

「好喇！自己行啦。」

「唔自己行呀…」

「不如行呢邊呀？您要由第幾級開始行呀？」那是另一條經籃球場到婆婆家的路。要行上一條長長的樓梯。

「第…嗰級！」他指著一半的位置。

「好喇！」行一半，都好過要抱全程吧。

去到電梯口，見到一個婆婆。

「爸爸，抱呀。」

「咁大個唔洗抱啦！醜死怪！」婆婆說。

「爸爸，抱呀。」Jayson 怕醜地望著婆婆笑，但開始有點扭計。而且那裡有很大陣油漆的氣味，所以我抱他行到另一邊。

電梯上到去之後，我問他要我抱到那裡。

「爸爸抱我行走廊，到樓梯自己行。」我們要行多兩層樓才到婆婆那裡。雖然討價還價，但肯自己行已算不錯。

去到婆婆那裡，笑著走到沙化邊。他自己除了鞋後，把姐姐遞給他的衫掉到地上，然後走開。

「去邊呀，Jayson？！」

「我去洗手。」我是否聽錯？他最討厭洗手，竟然自動去洗手？！天啊！莫非兩歲過後，真的開始生性？！

洗完手時…

「爸爸，ABC 之後係乜？」

「ABC 之後係乜？」完全摸不著頭腦… 「係唔係 DEF？」

「唔係呀。爸爸…，可唔可以借個電話？」有時不得不佩服 Jayson 的問題技巧。例如如果他想要我的電話玩，他不會直接問。他會問我的電話有沒有電。這次問 ABC 的原因，是我最近新買的遊戲：Alphabet（郭先生介紹）。想知 ABC 之後是甚麼，最好當然是玩一玩啦。叫我怎樣拒絕？！

「但爸爸要趕番公司喎。唔借得您玩呀。」有人開始扁咀。公公說讓他玩一會。那我便交了給他，說明條件之後，婆婆一邊為他換衫，他一邊玩我的電話。

他玩到「H」的時候，我問他：「玩到「I」就還俾爸爸好唔好呀？」

「玩到「J」啦。」加上一個甜美的笑容，這個提議很難拒絕。

到「J」的時候，我跟他要拿回電話。他笑笑口，離開遊戲跳到主頁，把電話交給我！天啊！我是否在做夢？！三歲後是否便會變成這樣？！我差點喜極而泣。終於守得雲開見月明啦！



~ Lindberg