北海道親子之旅：富良野肚臍祭篇

富良野位於北海道正中央，就好似人嘅肚臍部位。為咗祈求事事順利及身體健康，每年7月28日、29日會舉行肚臍祭典活動。會場喺富良野車站附近嘅一條大街。其中最精彩，當然係肚臍巡遊。

我地大約四點鐘到達。會場嘅安排非常之好，有人派紙仔教我地點去泊車。出面落住大雨，我哋都行咗兩個圈先搵到遠處嘅圖書館停車場。因為大雨，契爺落車買遮。但當佢返嚟嘅時候，雨就細番。落車步行大約五分鐘就到會場。

原先下午有兒童版嘅肚臍巡遊，但因為天雨關系而取消。不過即使落住雨，會場中心舞台前面，仍然有人喺到跳舞表演喎。

我地見一個個戴住草帽嘅人喺到隨歌起舞。

睇真啲，原來每副面皮，都係人嘅大肚腩！好搞笑呀！

我哋搵到其中兩位同我地影相。

我哋希望夜晚嘅大型巡遊可以如常舉行。所以四圍行，買下野食，打發下啲時候。希望夜晚唔好落雨。

呢檔嘅雞蛋仔… 不掂… 又貴！只可以當係一舊蛋糕仔。不過 Jayson 都食咗幾舊。

啲雨落下停下，都叫人有啲沮喪。

大巡遊應該七點開始。我哋只好四圍搵野影。

成條街任行，Jayson 自得其樂。

「契爺行啦！」

其間有一個抬神檀嘅儀式。

抬嘅人，清一式女士。

每人飲過一口啤酒之後，就將神檀抬起！

咁難得嘅機會，我哋當然追住影啦！

幸得天公做美，黃昏過後，雨過天清。

於是我哋就搵個有利位置等睇巡遊。

巡遊表演開始啦！

由不同學校及團體組織成嘅巡行隊伍，每隊都有各自嘅特色。

（影片前半段係抬神檀嘅儀式。）

整個巡遊大概歷時三十分鐘。氣氛好好。雖然有啲中學生好似俾人迫嚟，但好多都玩得好開心。仲見到有人特登嚟呢到，參加呢個肚臍祭巡遊。

隊伍行完一次，應該會行多一次。但我哋睇唔到。我哋只係睇二十分鐘左右就要走啦，因為有餐美味嘅意大利餐，喺民宿等緊我哋呀！



~ Lindberg