五十四日環遊美加 之 多倫多的南下北上

玩完多倫多之後，我哋就開始我哋嘅南征北討！首先，我哋開咗架七人車落咗去睇大瀑布！

尼加拉瀑布真係非常壯觀！為咗全面接觸大瀑布，我哋分別由加拿大呢邊望過去，又過境到美國嗰邊望過嚟，仲坐船由下面望上去。點睇都咁多水。勁！

除咗睇「水」，大瀑布附近都仲有好多遊客玩意，例如「信不信由你」、小型高爾夫球等。我哋喺嗰到都玩咗一整日。

之後我哋就跟本地旅行團北上去渥太華、魁北克、蒙特婁等，玩四日三夜。跟得團當然係走馬看花啦。加上已經係十幾年前嘅事，我當時嘅旅行日誌又只係寫到前一站紐約。所以呢… 下面呢到係… 某某野生動物園。

呢到係…渥太華嘅嘅… 國會大廈… 呱。

呢到我記得！係蒙特婁嘅奧運會主場。

魁北克俾我嘅印象比較深。因為呢到講法文。午餐去到當地嘅麥當勞，我哋想象唔到，喺一個北美國家，竟然講英文對方係會唔明！感覺好似飛咗去歐洲一樣，好神奇。

跟團嘅其中一個原因，係地方太大太遠，唔想自己揸車。喺車上面，大家都瞓到隻豬咁。不過都好難怪嘅。玩咗差不多五十日，唔攰就奇囉。

上面嗰到應該係千島勝地（Thousand Islands）。印象比較深係因為有得坐船觀光。呢到啲島仔好得意，五大湖及聖羅蘭河（St. Lawrence）上有成千個島仔，細細個島都可以俾人買去起屋。住喺上面都幾寫意。

當旅遊巴帶我哋返到多倫多之後，亦結束咗我哋加拿大之旅。下一站，我哋就返到洛杉磯，準備回歸祖家。



~ Lindberg