節瓜的志願

這晚替 Jayson 做馬殺雞的時候…

「爸爸，我第二時係唔係要做您做嘅工作？」Jayson 突然問。他何時學識子承父業這個道理？

「唔洗！您鐘意做乜咪做乜囉。」我回答說。心裡想即使他要，將來也未必有機會繼承父業。唉…

「哦…」

「如果您努力學習，第二時就有得選擇囉。學爸爸計數又得，學媽咪做科學家（的助手）又得，學契爺整電腦又得… 您鐘意做乜咪做乜囉。咁您想做乜呀？」 

「醫生囉。」Jayson 自小就說想做醫生。

「做醫生要讀好多書，好辛苦㗎。醫生要醫病人，好大責任。如果醫生唔叻，就醫唔好人㗎啦。仲有機會會醫死人㗎！」

「哦…」

「咁如果您想做，爸爸媽媽一定會支持您嘅。」話到尾，家中都有兩個生化學家，爛船都有三斤釘。

「好呀…」Jayson 答。「咁牙醫呢？」

「哦… 即係臻善嘅爸爸咁呀？牙醫都係醫生，不過淨係醫我哋啲牙齒。醫生有好多種㗎，除咗牙醫，仲有獸醫。」

「獸醫？」

「係呀… 即係醫動物嗰啲囉。」

「哦… 即係嗰啲姑娘去 Zoo 入面醫啲動物嗰啲呀？」

「都可以咁講嘅。獸醫除咗去動物園，仲會醫寵物囉。 」

「寵物？」

「係呀，咪好似 Julie 姐姐，貓貓狗狗兔仔囉。」

「哦… pets。」Jayson 說。「爸爸，您頭先講獸醫，我仲以為係好『瘦』嘅醫生添。」

他雙手舉起，扮成很瘦的樣子。嘩哈哈哈哈… 笑到我流眼淚。

（參考圖片） 

「第二時做醫生賺到錢，咪可以帶您女朋友去（您最鐘意嘅）Club Med 囉。鐘意請埋爸爸媽咪去都得。」我又灌輸孝順的概念，但亦補充說：「不過即使您讀唔到書，爸爸媽咪都會咁錫您。最緊要您搵到自己喜歡嘅工作啦。」

~ Lindberg