平民 . 餐館 Ristorante

好耐冇寫過食評。但呢間嘢真係唔寫唔得。今時今日仲食到啲咁嘅嘢，簡直係奇跡！

餐館 Ristorante

地址：鰂魚涌英皇道1010號香港水族廣場地庫11號舖 

電話：2561-1193

其實呢間嘢都開咗好幾年。但即使好近自己屋企，我一直都冇入過去。因為除咗係花園餐廳之外，本人對其他「豉油西餐」嘅興趣不大。所以而且最大問題，係佢個價錢牌有啲唔合理。雖然位於鰂魚涌一個冇人去嘅商場地庫，但都冇理由五、六十蚊就可以有個餐㗎嘛？！仲有賣海鮮龍蝦等，以我嘅專業眼光，一定係食垃圾！

直至有一次，諗嚟諗去都唔知想食乜，於是就入咗去博一博。就喺一餐飯之間，估唔到建立咗二十幾年嘅價值觀，就咁就完全地崩潰咗。

雖然呢度外表好似港式豉油西餐，但實際上一啲都唔豉油。意粉類五、六十蚊有得交易。如果俾七、八十蚊，已經可以食「行政套餐」，多一個前菜之餘，主菜有扒類嘅選擇。如果叫個肉眼扒跟餐，都係差不多價錢。以下嘅評論，係建基於呢個消費。 

餐湯係港式西餐嘅一貫水準，唔算太好，但絕對冇可能投訴。餐包熱辣辣，好有誠意。前菜係有幾片肉嘅沙律（好似每次都唔同）。有次食二人餐，前菜係一盆海鮮。一個二百蚊唔洗嘅二人套餐，前菜可以有蝦有蜆有螺，仲要幾新鮮，我一路食，一路滴汗…。

我哋亦試過散叫唔同小食，例如白酒煮青口、燒牛脷、焗田螺等，味道都算唔錯。材料算中等，煮法都有改善空間。但價錢真係冇得彈！

重點係啲主菜。牛扒唔係「爛布」，有肉味，冇馬肉成分。日式薑汁豚肉，味道好肉厚多汁，唔會太難消化。有一次試過芝士雞胸卷，唔會差得過自己地頭嘅好多。鐵板類都係港式西餐嘅一貫水準，食得過。最攞命係啲意粉。好味之餘仲要條條 Al Dente。以咁嘅價錢，絕對係超水準之作。

另一絕係啲酒。有乜理由一間主打本地人客生意嘅平民餐廳，理論上冇乜人會叫酒，都有一個十幾隻酒嘅餐牌？！仲要價錢係超市價？！即使我唔可以飲酒，有時都要破例，叫一支五、六十蚊（半支裝）嘅餐酒嚟飲下。智利嘅 Sauvignon Blanc，唔會死錯人。一切都好似好唔合理，但謎底好快揭開！

呢晚我哋又去食過。原本想去 Outback 鋸扒，點知冇位。既然都預咗，就食豪啲！所以我哋叫咗波士頓龍蝦！龍蝦套餐兩位起，平日每位 $88！！！天啊… 咩餐廳嚟㗎？！

$176 有兩個餐湯、兩份半隻波士頓龍蝦、兩個意粉、咖啡或茶。龍蝦新鮮彈牙，芝士焗或日式燒汁都好好味！喺普通餐廳都只可以食到雪藏嘢龍蝦，但呢度嘅一定唔係！另一方面，一個意粉係香草醬蜆肉天使麵，另一個係雞肉米型粉。兩個都係超好味。即使啲醬汁可能係現成嘢，但味道一啲都唔差。雖然嗰日我冇乜胃口（因為我連續兩餐食錯嘢），但都忍唔住口食哂！仲要回味到番到屋企即刻寫幾百字，以表我嘅敬意。

環境都算舒服。因為我嘅職業病，我嘅要求會高一啲。正如一個風水師睇風水一樣，平常人可能覺得冇乜嘢，我會話整體唔算合格。起碼咁嘅食物質素，唔應該俾我有一個「豉油西餐」嘅錯覺。如果配合好啲，應該會再多啲客。

服務方面係超水準！唔好睇佢一班中年男人，面冇笑容，但服務非常殷勤！比起自己地頭嘅後生仔，呢班叔叔好好多！樣樣做足之餘，態度都好好。我仲記得第一次去，Jayson 話要開「大」。但我記得商場嘅洗手間唔乾淨，好彩一位侍應教我哋去隔離中式酒樓嘅廁所，果然乾淨好多。

而點解可以咁「平、靚、正」？去一次廁所就可以將謎底解開！大家唔好誤會，唔係核突嘢！

原來西餐廳係中式酒樓嘅一部份。佢哋除咗共用一個廚房及部份人力之外，最重要係啲材料！中式酒樓賣海鮮，龍蝦隻隻新鮮，西餐廳真係可以隨便攞。唔同其他獨立嘅平民餐廳，賣唔去就死得啦！所以呢到可以食到啲好嘅材料。類似嘅經營模式，係我一直夢寐以求。因為近年嘅經營成本實在太高，有方法可以物盡其用，係一個自食其力嘅生存方法。

但即使入貨會平啲，我都覺得有啲平得唔合理。原因可能係：1）賣大包；2）計錯數。但點都好，得益嘅一定係食客。呵呵呵…

而餐酒方面，我有理由相信佢啲酒係同對面嘅酒舖買嘅。所以貨源多，又唔洗存貨。又或者係搭單賣，平得有道理。

除咗晚餐之外，我哋都去過食港式早餐。跟隔離大家樂嘅價錢分別唔大，但質素都好少少。加上大家樂好爆，所以呢度都有好多捧場客。

我寫呢篇嘢嘅另一個原因，係佢假日嘅龍蝦餐，竟然喺唔知咩時候，由 $128 減到 $108！可能因為想貼近平日嘅價錢。但減價必有因，我好驚以後都食唔到！所以一定要幫佢宣傳一下！呢啲咁益食客嘅平民餐廳，真係要大家鼎力支持一下啊！多謝！

~ Lindberg