明記什果涼

今晚月黑風高。回家途中，原本架車已經轉咗一半入停車場，點知眼尾見個鐘顯示出10:35pm，心血突然來潮，將架車扭番出嚟，一直開去「明記糖水」。

明記糖水
地址：西灣河西灣河街114號

其實都好耐冇幫襯過「明記」。應該自從 Jayson 媽大肚之後都冇機會食過。我最鐘意食佢嘅什果涼（粉）。生果鮮甜，涼粉夠味，珍珠煙韌，椰汁糖水剛剛好。份量好足，大大碗都夠兩個人食。但通常我都獨食一碗。哈哈哈… 今晚亦唔例外，我都係叫咗一碗什果涼，攞返屋企同 Jayson 媽食。

「明記」喺港島東都算出名。好多人都專登開車嚟買外賣。晚飯時間過後，店外例必排滿人。雖然啲人成日話，做糖水成本低。一碗咁嘅什果涼粉賣你 $23，賺到笑。其實我自己就唔係咁睇。首先，要做到一碗好食嘅糖水，當然要有好嘅材料。而更重要嘅係一年三百六十五日都要好。加上用心嘅製法，自問俾 $23 我一定做唔到。而且如果係咁講，星巴克一杯冇咖啡味嘅咖啡咪仲攞你命！哈哈哈…

雖然宵夜整碗咁嘅野都幾大鑊，但耐唔耐一次，而且咁好味，肥少少都抵呀！



~ Lindberg