愛爾蘭瘋薯

先幾個月前已經聽過哩間野個名，聽講話好多人排住隊買。早幾日食完個（細細個嘅）漢堡飽之後，行過見冇人排隊，於是就買一盒嚟試下。

愛爾蘭瘋薯 Ireland's Potato
地址：銅鑼灣謝斐道518號Shop A（總統戲院斜對面）

一杯炸薯條要 $30，真係唔平。不過都勝在即叫即炸。而佢嘅薯條比較實身。有啲似焗薯嘅質感，不過又唔會太粉，有薯仔味。我要原味嘅芝士醬。味道非常濃郁，但又唔會太膩。有啲香香嘅假煙肉碎。雖然簡簡單單，不過熱辣辣都幾好味。

但可惜真係要即刻食。由我買完之後，行番公司短短八分鐘嘅途中，啲薯條開始凍，芝士亦開始變硬。原本都冇乜所謂，但硬咗嘅芝士就黐唔到喺啲薯條上面。而且因為凍咗，就開始食到啲鹹味。到最後直頭鹹到苦，再食唔落口。

哩間店俾我嘅感覺，應該係想形造一個賣薯條配啤酒汽水嘅氣氛。道理上應該好夾，亦會好好搵。但可惜哩間舖冇位俾人喺入面坐或企。要企喺條街到飲啤酒都幾難想象。如果我係佢，一定會留啲位整幾張高檯或欄杆。地方唔洗多，只要可以吸引到幾個人入嚟飲野，自自然然會有人跟住做。到時人一多，即使企喺條街上飲啤酒都唔覺怪啦。

~ Lindberg