Tropic Thunder 發人心省

入場前以為 Ben Stiller + Jack Black 再無哩頭加個 Robert Downey Jr. 會係一場鬧劇。但出奇地，竟然都幾發人心省喎！

原本以為哩套係普通嘅喜劇。故事大概係講一班大牌演員拍戰爭戲，因為夾得唔好，劇本嘅原著作者就提議導演，將佢地放入一個模擬戰爭環境，希望可以拍到一啲真實嘅演出。點知中間出咗事，假戲變成真做，笑料百出。而故事嘅背後，其實都係喺到諷刺電影業同演員。都幾發人心省㗎。

套戲啲笑料真係笑到我肚痛。雖然有啲場面都幾核突，不過都可以接受。而且都好明顯有諗過針對我地華人市場，有啲野應該要係中國人先識笑。例如戲中一名澳籍白人演員（Robert Downey Jr. 飾演），為咗接拍哩套戲，要飾演一個黑人軍人，專登用中國古法，將身體嘅染色素改變，變成一個黑人。而最搞笑嘅係，所謂嘅中國古法，係用一支藥水，而支藥水，竟然係「正骨水」？！個場面勁爆笑。當然我後面個鬼佬就唔會明白我笑乜啦。

Robert Downey Jr. 喺套戲入面做得好好。我會提名佢去同小丑 Heath Ledger 去角逐奧斯卡最佳男配角。正如佢自己喺戲中所講，演一個白痴嘅角色，真係做到完全白痴咁就冇吸引力。戲中佢扮演一個白人演員，扮一個黑人軍人角色。佢自行舉止好似一個黑人，但又睇得出只係扮做一個黑人，見到佢個樣就想笑。真係好難想象到，佢就係前一排上影嘅 Iron Man。

戲中有幾段對白好抵死。不過都幾多粗口。有幾句令我有好深刻嘅印象：

「I don't read the script. The script reads me. 」

「I know what dude I am. I'm the dude playin' the dude, disguised as another dude! 」

套戲另一個好強嘅地方，就係啲串星。除咗 Tom Cruise 有唔少戲份之外，仲有好多熟悉嘅面孔。有：Tobey Maguire、Tyra Banks、Jennifer Love Hewitt、等等。

近排悶悶地，可以睇到一套咁開心嘅喜劇，真係唔錯呀。



~ Lindberg