懷石料理 @ 灘萬日本料理

上星期二喺我地結婚周年紀念。我地當時專登選擇 9 月 30 日結婚，勝在好記，而且之後嗰日一定係假期。原本一早訂咗洲際去食自助餐，但因為餐廳怕生野會出事，所以冇生野食！取而代之，係和牛、龍蝦、焯海鮮。Jayson 媽覺得冇乜興趣，所以我地去咗食懷石料理。

灘萬日本料理
地址：金鐘金鐘道88號太古廣場2座港島香格里拉酒店7樓
電話：2820 8570

懷石料理通常都係去日本啲溫泉酒店先有機會食得到。細細碟，好多碟，樣樣都做到好靚。色、香、味三者之中，懷石料理喺「色」方面一定攞足滿分。其實我覺得食野，一定係用對眼睇先。之後先用鼻去聞，口去嘗。所以見到一碟二碟咁靚嘅食物，心情都靚啲，對之後「香」、「味」嘅評價都自然會高啲。

我地分別叫咗兩個唔同嘅懷石料理。Jayson 媽叫咗「桐」，即係正標準嗰隻，而我就叫咗牛扒。其實兩款都係大同小異，只係主菜唔同。而且兩個都係一樣價錢，每位 $750。

先來一大盆前菜。見到已經都開心，而且每一碟都好好味。我覺得最開心嘅，係好多時都唔知放乜野入口。估估下，都幾得意。就例如七彩碗入面白色嗰一舊，軟綿綿，冇乜味。起初 Jayson 媽以為係年糕。後來我覺得有啲奶香，應該係水牛芝士。真係同 Kinder 出奇蛋一樣咁好玩。哈哈哈…

Jayson 媽有個松茸菇湯。好香菇味。

我嗰個唔同。有粒蝦丸嘅物體。

魚生好新鮮。雖然唔係好多款，但都非常滿足。

蒸蛋好好味。中間嗰舊係類似糯米嘅野。橙色嗰啲係蕃茄，少少酸，令糯米感覺冇咁滯。好厲害嘅配搭呀。

哩碟係 Jayson 媽先有。有蟹肉，同埋我鐘意滑潺潺嘅野。我當然有偷嚟食啦。

Jayson 媽嘅主菜：網燒牛肉。雖然薄薄一塊，但都好多肉汁。好味！

我嘅主菜：牛扒。煎得好香，好多肉汁，好好味！感覺上，好似比 Jayson 媽嗰碟抵好多。

我有白飯同埋麵豉湯，而 Jayson 媽就有碗烏東麵食。

飯後果：清甜嘅水晶梨、芒果、巨峰提子。食完之後，感覺功德圓滿，非常滿足！

即使樣樣都細細碟，食完都真係好飽。$750 一位，雖然唔算係最靚嘅材料，咁嘅環境，咁嘅手工，絕對係物有所值。



~ Lindberg