20 世紀少年

星期二係我地嘅結婚周年紀念，晚飯因為要去食懷石料理，所以放咗 Jayson 喺婆婆屋企。見尚有時間，我地就走咗去睇《20 世紀少年》。

之前，我都冇睇過成套漫畫。但聽咗朋友嘅簡述之後，就非常想睇。《20 世紀少年》有兩個吸引我嘅地方。第一，作者係浦澤直樹。佢另一本出名嘅著作，就係《Monster》。我亦都係冇睇過《Monster》套漫畫，而只係每個星期六，追睇無線播嘅動畫。雖然個故事好似左抄右抄，不過個骨幹都算完整，而且氣氛做得好好。而另一個吸引我嘅地方，就當然係開於統治地球啦。

入場之前，我已經做咗少少功課，睇咗第一期漫畫。故事不停穿梭 1973 / 1998 - 2000 年，人物又多，所以都要時間消化一下。簡單嚟講，故事係話有個小學生，同一班朋友憑空想象壞人點樣侵略地球，寫咗一本預言書。點知過咗二十幾年之後，預言真係一一實現。幕後黑手係一個自稱：「朋友」嘅人。因為只有兒時嘅同伴知道哩本預言書，所以「朋友」一定係身邊其中一個。到底，「朋友」係邊個呢？到底點先可以拯救地球呢？

用睇過一期嘅心情去睇哩套戲，覺得都算唔錯。我都明白要將一套咁複雜嘅漫畫拍成六七個鐘嘅電影，有一定嘅難度。所以有好多地方都冇交代得咁好，而且氣氛冇漫畫咁緊張。但如果冇睇過漫畫，就應該唔會太覺。演員真係粒粒巨星。雖然大部份都係上「半」代嘅明星，不過正好適合故事嘅情節。

睇完之後，首主題曲：《20th Century Boy》不停喺腦海中響起。

好似俾人洗咗腦咁！就連廁所都見到「朋友」！好邪呀…

於是，假期一有時間就狂煲漫畫。總共有 22 期，我睇到 13 期。我終於知道邊個係「朋友」啦。果然如我所料！立即鬆咗一口氣…

雖然《20 世紀少年》之後嗰兩隻要等明年春、秋先有得睇。到時一定睇晒套漫畫。不過都仍然好期待入戲院睇埋個結局。



~ Lindberg