好兄弟結婚

上星期六係 Kenさん 嘅結婚好日子。Kenさん 係我讀 MBA 嘅同學。雖然只係識咗短短六年（撞鬼，原來識咗佢地班人咁耐啦…），但好開心有幸做佢嘅兄弟。等我仲以為自己以後都冇機會再做兄弟添。而我有車當然係被挑選嘅主要因素啦。哈哈哈…

因為一對新人喺中午擺喜宴，所以行程都幾趕。我早上六點起床，裝身食早餐，準時到新郎哥屋企。新郎哥住喺太子。我竟然冇迷路，真係好彩。反而另一位兄弟（奧利花）拍心口話識路，到頭來唔知去咗邊！笑死我地。其實前一晚我上 Google Map 入面，印晒啲路線圖出嚟，先冇出事咋！真係算做足功課㗎。

今次婚禮，新人想簡單一啲。而誓估唔到嘅係，新郎哥咁信得過（睇得起）奧利花同我，竟然只靠我地兩個兄弟（aka：兩條蛋散）去接新娘。我更委以重任，掌管所有金錢。而我竟然大頭蝦到上咗一半樓，先發現漏咗封開門利是喺㗎車到！發現之時，立即以全速跑番去架車到攞。好彩最後都冇失禮人。

接新娘都唔算太過難。加上我地有「人生經驗豐富」嘅奧利花，將所有難題迎刃而解。不過犧牲些少在所難免。以下張紙係新郎哥矇眼幫我地劃口紅，之後印落去嘅。大家估下，究竟上邊定下邊係我呢。

搞完一大輪之後，終於去到酒店。整個註冊同喜宴嘅過程都十分溫馨。今次喺我第一次下午時間喺香港去飲，啲食物都好豐富同好味道。我地一檯好朋友，一邊食，一邊笑。感覺好「人生」。

喺哩到再祝福一對新人，百年好合，永結同心，年生貴子。



~ Lindberg