燃燒吧！1：1 黃金聖衣

可以擁有一件聖鬥士聖衣，相信係每一位同我同一個年代嘅朋友嘅夢想。以前都曾經擁有過一兩套模型，但當時唔識珍惜，都唔知放咗去邊。依家剩低嘅，只有一套黃金聖衣扭蛋。唉…

今日有幸嚟到海港城，得以拜見 1：1 嘅人馬座黃金聖衣，體內嘅小宇宙，不禁燃燒起嚟。
玩具公司 Bandai 喺海港城舉行咗個「Tamashii Nation」官方展覽：

日期    2008 年 11 月 28 日 至 2008 年 12 月 7 日
時間    下午 12:00 - 下午 8:00
地點    海港城海運大廈二階 SportX 多功能運動場

一去到就見人頭湧湧，有一條長龍排隊買野。而喺會場門口迎接大家嘅，就係 1：1 嘅人馬座黃金聖衣。好感動呀！相信每一個星矢迷都想著上身試下。

其實咁多個黃金聖鬥士入面，我最鐘意都係穆先生。除咗自己係白羊座之外，佢嘅絕招：水晶牆 Crystal Wall 、星光滅絕 Starlight Extinction 都非常之強。一把紫色嘅長髮，型到爆！

每件模型真係好型、好靚！

會場裡面仲有好幾個聖鬥士星矢嘅經典場景。除咗「天秤座冰棺」（舊冰入面真係有個冰河喺入面！）之外，

最震撼莫過於「雅典娜之嘆息」。回想起當時睇公仔書，呢幕真係睇到喊。

雖然唔算好多野睇，不過每一件模型都好靚。同場嘅「超合金主題展覽區」仲展出咗好多其他超合金展品，如：鐵甲萬能俠系列、六神合體等等。鐘意星矢嘅朋友，有時間真係可以去睇睇。入場費用全免！

~ Lindberg