型男寫真出版

好多個月前，我為 Jayson 出咗一本純美寫真集。入面全部都係出世至一個月大時影嘅相。36頁彩色可愛照片，加上爸爸的情心語句，釘裝精美。限量全球發行，只得兩本。

為咗慶祝一歲生日，我專登出咗本「型男寫真」。全書62頁，每一頁都係過去一年嘅生活點滴。硬皮釘裝，精美印刷。今次比上次更珍貴，只係發行得一本。因為真係好鬼貴！

收到件郵件嘅時候真係好興奮。見個盒咁靚，就好想快啲睇下入面本書。
封面： （唔知佢指乜…）

書背：（傻豬樣…）

因為本身冇乜美術天份，加上懶同冇心機，iPhoto 呢個軟件就最啱我呢種人啦。程序好簡單，首先選擇一個啱心水嘅樣板，然後放自己鐘意嘅相上去，按一個掣，俾錢，過十日左右就有貨收。真係話都冇咁易！

排版完全自動。基本上，識得㩒掣就可以做到一本。

書皮內頁：

可惜嘅係實在太簡單，唔可以自行改動太多野。就連想放張相喺邊個位，一張大，一張細，都唔得。寫字上去都有一定嘅困難，唔係個個樣板都有得加字。
我呢款硬皮釘裝，8.5 x 11"，$235有20頁，每多一頁就$7.70。

我有62頁，計埋$56嘅郵費，總共$614.40。比我買嘅是但一本寫真集都要貴！

http://www.asia.apple.com/support/photoservices/hk/product_specs/

「乜您買過好多本寫真集咩？！」背後突然有一股熱氣…

「爸爸，媽媽對眼好似想噴火呀！」

而印刷方面，顏色同光暗都算滿意，可能我要求唔高啦。不過像素就好似差啲啦。雖然大部份嘅相都係用細機影，不過微粒都冇理由咁粗。我覺得可能係上載去 Apple 嘅時候，做咗啲壓縮。唔係六十幾頁紙，冇理由得 40MB 咁細呀…

仲有樣野令我好激心。就係放咗啲相上去印之後，iPhoto 出咗個更新。更新咗之後，話印書會靚啲。靚幾多我唔知，不過都足以激死我啦！

而更灰嘅係，我攞咗本書去俾嫲嫲睇。佢話啲相係舊嘅，玩真人好過。之後就抱走咗 Jayson。天啊… 我啲心血點解冇人識欣賞㗎？！唯有等 Jayson 大個仔先一齊睇啦！



~ Lindberg