Julie 驗身記

自從哥哥走咗之後，我地成日都好擔心個傻女。而死人頭 Hill's 轉咗配方之後，Julie 有時都唔係好肯食野。叫聲都有啲唔同，好似喺到要求啲乜野咁。近排見佢啲飯都唔係好郁，一磅之下，竟然輕咗半磅！佢本身都已經瘦，得 7 磅左右。再少半磅真係幾心痛。為免夜長夢多，都係帶佢去做一個身體檢查。

今個星期初已經預約咗 SPCA 做檢查。佢地嘅 Wellness Clinics 只係星期一至五先有。所以我就約咗尋日上午（蛇）去。到最後一刻，Julie 媽（即 Jayson 媽）見 Julie 都有食啲新糧，問不如唔好去。因為此行真係好艱險。十隻貓有八隻都怕出街，而 Julie 更會驚青到瀨屎。見佢咁樣，都唔忍心嚇佢。不過如果因為驚，而好似哥哥咁，冇及早接受適當嘅照顧，我覺得會恨自己多一世。所以都係照去可也！

尋日朝送 Jayson 去婆婆家之前，我先關晒啲房門，然後靜靜雞喺房整好個袋。誰知 Julie 好醒目，聞聲即逃，躲到沙發後面。於是我就先送走 Jayson。返嚟嘅時候，Julie 好開心咁歡迎我，好似乜都唔記得晒咁。我見時間尚早，就坐低休息一下。轉個頭，突然唔見咗 Julie。好明顯再次發現勢色唔對，又躲到沙發後面。我出咗九牛二虎之力，終於放咗佢入袋。

路上 Julie 不停咁叫。到差不多到 SPCA 嘅時候，突然嚎叫兩聲。我就知出事啦！又瀨咗！好彩就到，唔係實臭死個司機。快快登記之後，就忙於清理便便。

入到房間之後，醫生問我一大堆 Julie 嘅生活情況。我主要講出佢近排唔多食野，叫得好唔開心咁，少咗個哥哥，多咗個細佬。我帶咗佢之前一晚嘅大小便嚟，但因為隔咗一晚，醫生話未必驗得準。冇計，都係盡力而為啦。

之後佢就同助手為 Julie 進行檢查：

• 牙：有少少牙石，不過唔洗理。
• 眼睛：正常。
• 耳仔：乾淨。不過都好耐冇洗，幾驚污糟呀。
• 心跳：冇雜音。
• 呼吸：正常
• 體重：都唔算太瘦。
• 毛色：唔錯，都有光澤。即係有自己做清潔。
• 肛門腺：正常。

Julie 非常緊張，不過都算合作。之後就抱去樓上量血壓、抽血做檢查。我冇得陪佢上去，只可以喺下面等。大約十分鐘之後，佢地落番嚟。

醫生話雖然 Julie 咁緊張，血壓都表現正常。因為要驗血同量血壓，所以剃咗頸同手仔少少毛。陰功女。而且仲順便幫佢剪咗指甲添。而驗血同大小便嘅報告就即日會有。遲少少會有人打俾我。

懷著焦急嘅心情，等到五點半，助手終於打俾我。幾個報告，一切大致正常。真係謝天謝地！尿因為唔夠新鮮，所以驗得唔好，不過都幾濃，可能飲唔夠水。而血入面嘅離子就唔係好平衡，鉀比較低。可能真係同食少咗野有關。唔夠鉀，隻貓會攰少少，冇咁活躍。Julie 近排真係好似幾攰咁。醫生覺得可能真係壓力嘅關系，可以考慮用 Feliway。佢係類似一種貓先聞到嘅香氛，可以令到佢地平和一啲。不過一支插電（用一個月）嘅香氛要 $480，都唔平。我想試下轉完啲糧，同埋試下同佢玩多啲。睇下會唔會有用。

除咗藥物之外，醫生都贊成搵多隻貓陪下佢。自少佢就有哥哥陪，威威唔喺到，當然會寂寞啦。驚就係驚細貓會有流感囉。不過 Julie 嚟嗰陣咪又係有。過多一排再打算啦。

我記得當我差不多離任 SPCA 嘅時候，佢地開始搞呢個驗身計劃。我唔知成績如何，有幾多人用呢個服務。今次埋單 $1,250（包防疫注射，不過 Julie 前幾個月先打咗，所以唔打得）。雖然報告未必代表一切，但都算買到一個安心，絕到值得！而且醫生同助手都好細心為我講解，感覺一啲都唔馬虎。可能有啲人會覺得，對人都未必有咁好，對隻貓，洗唔洗呀？但我就覺得，對自己個女喎，當然要啦！希望 Julie 冇太過嚇親，永遠都健健康康啦！

「好驚呀爸爸。我唔要再出街啦！」

「咁您乖乖就唔出街街啦。」



~ Lindberg