我的機械人女友

上星期日，睇番一套之前上映嘅《我的機械人女友》。睇嘅原因，當然係綾瀨遙啦。但原來都有額外嘅驚喜喎。

我覺得呢套擺明係一套「宅男」戲。未來嘅自己，時空傳送一個靚女機械人俾現在嘅自己。除咗可以保護自己，仲羨煞旁人。雖然開頭冇乜情感，勝在可以玩育成，灌輸啲愛意落去。相信係每一個宅男夢未以求嘅恩物。

選角非常好。綾瀨遙唔算係一個極之靚嘅女仔，不過勝在有種講唔出嘅吸引力。而且，造型（對宅男）非常討好，入型入格。感覺十足十《新世紀福音戰士》入面嘅綾波麗一樣。

而男主角係之前拍《交響情人夢》入面嘅「爆炸頭」小出惠介。演出都好可愛。

導演郭在容曾經拍過極之出名嘅《我的野蠻女友》、同埋我應為係當今「恐怖片霸」嘅《假如愛有天意》（當你以為係最慘嘅時候，原來仲可以再慘啲）。今次拍日本片，其中幾場戲都睇到好溫馨心甜。而一場災難大地震，亦睇到個心好唔舒服。不過可惜，故事本身太簡單。雖然首尾呼應得嚟都有啲驚喜，不過整體感覺有啲薄弱。而且「Time Travel」呢家野好難令人信服，片中橋段，根本冇可能發生。不過話到底，佢唔係一套科幻片，所以唔需要拍到好似《Back to the Future》咁合乎邏輯。但對於一班尋根究底嘅宅男，可能會有啲失望。
戲中嘅主題曲同插曲都好好聽。亦都係驚喜之一。

約束の翼 - MISIA

Hi-Fi CAMP / キズナ：節奏輕快，經已成為我部 iPhone 熱播榜第一位！

~ Lindberg