病毒和預防疫苗

先幾日有網友問到預防疫苗嘅問題，仲記得我係「前科學家」。咁我就一定要認真回答一下。

首先，講少少基本野。點解對付病毒要靠自己？好多人都知道，受細菌感染就要食抗生素；受病毒感染就要靠自己。其實究竟「自己」喺到做緊乜，點解有人快啲好，有人就慢啲呢？
當我讀書嘅時候，我覺得病毒就好似外星怪物一樣。細菌靠我地人體而自我繁殖，做法比較「明刀明槍」。但病毒就入侵我地嘅細胞，利用我地嚟幫佢繁殖，做法非常卑鄙。而人類對付病毒最有效武器，就係製造抗體。

簡單啲去想象一下，病毒有唔同嘅形狀。有三尖，亦有八角。就當佢係一條鑰匙啦，一條有特定嘅形狀嘅鑰匙。而抗體就好似一把鑰。當鑰匙插咗入鑰之後，鑰匙就唔可以拔番出嚟。病毒被抗體捉住，只有淪落到被身體入面嘅白血球等清道夫食咗。不過要做得到咁，鑰一定要配合到支鑰匙。

上天嘅安排好奇妙。人體嘅染色體當中，有一段係負責製造抗體。其 DNA 嘅排列次序，就決定抗體嘅形狀。呢段 DNA 嘅排列，真係亂到唔亂。亦都係因為咁，我地人體可以製造出過百萬款唔同嘅抗體，以對付不同嘅可惡病毒。當生產到合乎鑰匙嘅鑰之後，身體就會「落單」製造更多同一款嘅抗體。

生產到適當嘅抗體，同埋生產到足夠嘅抗體都需要時間。因為每個人嗰段 DNA 都唔同，身體狀況亦都唔同，所以有啲人就快啲好，有啲人就慢啲好，而有啲人仲會唔會好。最好嘅例子，就係本人：乙型肝炎帶菌。做唔到，或者做極都唔夠多抗體，所以就打唔贏啲病毒，變成一個帶菌者。

打防疫針，其實係打啲死咗（或失效）嘅病毒入身體入面。呢啲病毒唔會繁殖，所以中招都冇（乜）事。但佢就可以刺激身體唔免疫系統，製造抗體。如果一個大吉利是，真係中招，身體已經有（足夠）可以對付呢隻病毒嘅抗體。有啲抗體可以留喺身體到好耐（如：甲乙型肝炎），有啲就會快啲玩完（如：流感）。

整個過程，最重要都係鑰同鑰匙嘅關系。如果唔係「絕配」，抗體就起唔到作用。打流感針，我有啲保留。因為有好多唔同種類嘅流感。打一隻，防一隻。頂多型狀差不多，防多半隻。每年啲專家話邊隻會流行，就打邊隻。最衰嘅係，如果身體麻麻地，仲會出啲感冒嘅徵狀。真係「無啦啦、多笪罅」。如果打咗 A 流感針而之後被 B 感染，始終都係出事。所以我自己都冇打過流感針。

問題係小朋友同老人家。打唔打好呢？醫生話，當買個保險啦。雖然未必保得中，而且有機會要交額外保費（出現中招嘅徵狀，例如發下燒之類），不過對於小朋友同老人家，如果感染流感而出現並發症，會麻煩好多。所以如果可以的話，都係打下啦。

Jayson 尋日去咗打一歲嘅預防疫苗。醫生話一個月後先可以打流感針。再一個月之後就可以打水痘針。

「爸爸，我地去邊呀？」

一歲支麻疹針據聞好「毒」（會有比較大反應），所以有啲朋友建議大些少先打。Jayson 打完又好似冇乜問題喎。不過打嗰陣當然喊晒口啦。

「媽媽，呢到望落乜好似咁熟口面咁嘅？」

「嘩！原來係鄒醫生！救命呀！好痛呀媽媽… 嗚嗚嗚嗚…」

「乖啦。打咗就健健康康啦。」

~ Lindberg


P.S. 如果有乜講得唔啱，歡迎指出。話晒都已經放低咗十幾年啦。謝謝！