百花齊放

終於打敗仗。我相信好耐之前已經中咗招，不過因為我抵抗力好，所以仲頂得住。但星期一晚去咗公司嘅聯歡會，11:30pm 開始，原本諗住玩一陣就算，點知都玩到 2:30am 先走人。可能因為唔夠瞓，所以就大感冒。

呢幾日都係食啲成藥，鼻塞塞都瞓得唔好。尋日朝早真係好辛苦。周身骨痛，狂流鼻水，又不停釣魚瞌眼瞓。唔知嘅，仲以為我毒海浮沉，「師父到」。有見自己眼都張唔開，所以我就決定返屋企瞓覺。瞓覺好嘅，希望可以快啲好番。但返屋企之前，我買咗啲法寶：

感冒冇藥醫，唯有用啲野舒緩下啲病徵。個人舒服啲，希望個病都快好啲啦。以我多年嘅經驗，鼻塞其實好麻煩。如果瞓覺嘅時候鼻塞，一張開口瞓就好容易喉嚨發炎。一發炎就咳，越嚟越麻煩。所以我會歇盡所能，以防鼻塞。先用鼻貼，唔得就搽薄荷膏，再唔得就噴鼻。真係可算係「百花齊放」。

Jayson 媽今日都變咗幪面俠。不過應該唔關我事… 呱…



~ Lindberg