老闆著草

近排工作好忙。先前忍痛裁走咗一個得力助手，啲工作要大家分咗佢。之後大肚員工突然去咗生產，啲野我自己攞埋嚟做。點知我老闆落井下石，話要離開公司，要我做埋佢個份。天啊…！

真係估唔到，我老闆比我更早離開公司。間公司係大家一手一腳搞出嚟。之前我想走，佢叫我留低。轉個頭自己為咗自己嘅前途而走咗去。真係講粗口都講唔切。不過當佢話俾我聽佢要走，我覺得鬆咗半口氣。佢係一個好好嘅「數佬」，有佢喺公司，感到有啲安全感。但依家啲生意咁差，邊到仲會有安全感呢。而且出少佢份糧，公司都易做些少。

但正係因為少咗個靠山，所以好大壓力。無時無刻都感到好似有舊大石壓住個心口，透不過氣來。好想同自己講，呢個係百年難得嘅機會，第二時就可以同 Jayson 分享一下啲經驗。眼前嘅爛攤子，唯有煮到埋嚟就食啦。


~ Lindberg

P.S. 以前一直以為自己已經升到頂。點知原來仲有「神檯」呢個位。唉… 老闆（淨低嗰個）話要加人工，我叫佢唔好玩啦。捱得過呢兩個月，鐘意點都得！


P.P.S 其實「著草」應該唔係指上面啲草，而係草鞋。穿上草鞋咪走佬囉！睇怕自己都要買定一對。唔知 Nike 有冇出呢？