美肌 / 虐打 / 邊爐

尋晚一眾網友，原本諗住約去食一蚊雞。不過搞下搞下，可能覺得唔好食，所以轉咗去譚魚頭打邊爐。

（相片來源：莎莉。）

是晚網友，有杏子先生夫人、雪姑 & 王子、莎莉及莎翁、Maggie、Emilili、貓奴、熊貓俠同我。同一班咁嘅人食飯，真係要好小心。小心笑到啃死！

首先大家為咗睇 Laughing 哥還陽，所以搵咗個電視位。可惜都係離電視太遠，聽唔到聲。但多得王子，佢部電話可以收電視（勁！）。雖然畫面收得唔好，眾人就睇酒樓嘅電視，聽王子嘅收音。真係辛苦大家啦…

而我地發現原來貓奴真係一個好好嘅導電體。事關王子部電話條天線收得唔好，但只要俾貓奴揸住，就會收得好啲！絕對有天線放大器嘅功能！可能就係因為咁，啲貓就鐘意瞓喺佢身上「收風」。哈哈哈哈哈…

莎莉呢日還番一套《What's Michael》俾我，佢話原本諗住下星期去馬灣玩先至還。佢話我有車喎。天啊！馬灣點開車入去呀？佢另我想起一位「好」同學。我地相約去行山，佢竟然帶本字典還俾人！玩野啊…！笑死我。

阿 M  不停咁為我地整野食，流露出佢善良嘅一面。相信好快嫁得出啦。

而另一邊箱，當我地一路食，貓奴就喺我隔離，不停為他人出頭而虐打我。叫佢做「衰人一號」就係冇叫錯！

之後莎莉嘅美肌相機出場。我都唔知 Fuji 嘅相機有「美肌」功能。功能上，大概係利用面孔探測，然後整走面上啲細小嘅黑點，同埋順滑咗個表面。白雪被影完之後，真係後生咗幾十年，塊面滑到好似 Jayson 咁會反光呀！之後大家不停玩呢部部相機。有部咁嘅相機，真係妝都唔洗化。我睇我都係時候要出手買啦…

我地不停咁食，不停咁叫。最後食咗勁多野，超飽。雖然埋單嘅時候有啲勞氣，不過真係食得好開心。希望下次會約到更多人一齊玩啦！



~ Lindberg