20 世紀少年 ~ 第二章

以《第一章》之氣勢，好難理解《第二章》點會咁靜。除咗冇乜宣傳之外，仲好難搵到有戲院做。香港島過咗兩個星期之後，竟然已經冇戲院上映！最後我地去咗圓方嘅  The Grand Cinema 睇。

《第二章》大概係描述漫畫單行本，由第五期至第十五期嘅故事。要將二十二期中嘅一半，濃縮成片長只得 141 分鐘，可知有幾多野會唔見咗。我一路睇，一路諗，如果冇睇過漫畫，到底會唔會明呢？之後我問咗我隔離嗰位，果然唔多明。

其實《20 世紀少年》嘅原箸中，用咗好多篇幅去描繪每一個人。有好多小故事去襯托，有時比條主線更加有趣。但奈何真係太多支節，根本冇可能一一搬上大銀幕。雖然係有啲可惜，不過即使睇咗有啲唔明，我隔離嗰位都覺得幾好睇。而且之後只要諗一諗，大致上都會明嘅。但當佢聽我講埋原本個故事情節，佢都覺得漫畫嘅說服力強好多。

除咗以上嘅美中不足，套戲都拍得唔錯。節奏緊湊，全無冷場（想有都難）。人物選角同造型真係超一流，唔出聲都估到佢係做邊個角色。好期待《第三章》！


~ Lindberg


P.S. 第一次嚟 The Grand Cinema，入面有 12 間戲院。行去我地嘅第 11 間，都已經行到腳軟。座位好寬敞，而且仲會震！佢呢到嘅「震動」影院座位，會因應低音效果而震。有幾段嘅畫面震，座位又震，真係幾震撼㗎。