給洗車伯伯的恐嚇卡

我屋苑嘅停車場，有一位洗車嘅伯伯。每年都唔知憑乜野理由判俾佢，可以洗停車場嘅車。普通一架私家車，$240 一個月。有個住同一個屋苑嘅朋友試過佢嘅服務，佢話伯伯抹到佢架車花晒。一桶水洗晒全個停車場嘅車，想乾淨都難。

起初我試過自己抹車。但打水嘅地方實在太遠啦（而且人又懶），試過一次就放棄。$240 一個月（原本 $230），而我部車又唔係新車，所以就由得俾伯伯抹。道理上係晚晚抹車（除咗星期六晚及公眾假期前夕），一個月打一次蠟水。不過我相信佢係是但用支雞毛掃掃下。隔幾日，見污糟先抹。

近排發現，架車好污糟。車身污糟我都唔太過介意。但四邊玻璃污糟到睇唔到野，都唔知用咗啲乜野水抹。每次開車都要噴水開水撥，先睇得清前面嘅路面。真係激死我。

前幾日，倒後鏡俾人放咗張廣告卡，宣傳一間洗車公司，做伯伯依家做緊嘅野。價錢都差不多。雖然有時都唔希望啲工作俾公司財團攞晒嚟做，不過起碼真係有得投訴下呀。冇改善咪轉公司囉。但我知道屋苑嘅停車場，「話」基於安全理由，唔俾第三者嚟洗車。與其再三向伯伯投訴，我將張廣告卡放咗喺車頭一個當眼位置。作為「恐嚇」作用。

想信伯伯有睇到張卡。所以之後幾日都抹得落力咗。希望情況可以繼續落去啦…



~ Lindberg