南瓜肉醬迷你螺絲粉

之前買咗一盒 Barilla 嘅迷你螺絲粉，我覺得好啱小朋友嘅咀型。見超級市場有日本南瓜減價，所以就試下煮個南瓜肉醬俾 Jayson 食下。

材料：
番茄 1 個
南瓜 1/8 個
蒜頭 1 瓣
豬肉 1 小塊
乾混合香草 半茶匙
迷你螺絲粉 半碗

做法好簡單。首先，將南瓜切成小粒，番茄用熱水去皮去籽後切成小塊，蒜頭及豬肉切碎，待用。切碎豬肉時，要留意啲筋。有就要整走佢，唔係就會炒埋一大舊。南瓜益養豐富，而且香甜。Jayson 都好鐘意食。

用少少橄欖油爆香啲蒜頭，然後加入豬肉碎。盡量炒到碎開晒。因為啲小朋友唔鐘意太大粒肉。

然後就落南瓜。可以收至中火，炒到些微軟身就落番茄。我家姐話番茄籽係導致盲腸炎嘅其中一個原因。我相信我自己食得唔多，但都中招。所以信不信由你。

加一碗水，水滾後收細火。然後放香草慢慢煮。煮到啲南瓜溶晒就差不多啦。

最後，可以加啲義大利白乾酪（Mozzarella Cheese），咁就更加有意大利風味喇。

以上份量，足夠食兩餐。整個過程，需時大概 45 分鐘，因為個南瓜需要啲時間去煮。 螺絲粉可以煮熟啲，唔好太硬。而煮俾小朋友食，我比較少落洋蔥，因為怕會有屁屁。

~ Lindberg