病況更新

終於跌得七七八八啦！正常嘅肝酵素係 42 以下。我最差嘅時候曾經高出十幾倍，去到 5XX。依家跌番到 67，希望唔洗食藥啦！

之前睇過一篇報導，話止痛藥或藥膏，如果含有 Diclofenac（雙氯芬酸），可能會對肝臟有影響。長期使用有機會引致黃疸、肝炎及肝衰竭等！我之前因為，經常有坐骨神經痛，於是都有搽啲止痛膏。心諗會唔會就係因為咁而出事呢？！於是我今次就問下教授。佢好快咁回答…

「唔關事！」

佢話因為外用嘅藥，吸收得唔係咁多。但我極之有理由相信，以上係教授嘅口頭禪。問佢乜野都話「唔關事」。又例如：

教授問：「跟排覺得點呀？」

我話：「啲皮膚好差囉…」

佢立即答： 「唔關事！」

而究竟點解起初會有問題，答案一定係：「唔知道！」

另一句口頭禪，好相信就係：「再觀察下啦！」

唉…

不過算啦。起碼知道朝住正確嘅方向走。賣藥嘅朋友有日專登打電話俾我，原來政府將會贈藥俾病發嘅人，為期一年。跟據過往經驗，都應該會一直贈落去。因為隻藥一開始食，就唔停得，所以冇理由唔繼續補助落去。一年藥費要二萬幾，真係可以鬆一口氣。其實作為香港一種幾常見嘅疾病，減少發病嘅機會，比起之後先嚟醫，對於整個社會，點都係化算啲嘅。
不過對於我嚟講，當然唔洗食藥就最好啦。四月尾再見！



~ Lindberg