新居大改造 之 重建篇

裝修呢家野，如果自己唔想煩，有人幫手諗真係好好多。我地今次真係好好彩有洛文，唔係都唔知點算！

新年之前，啲傢俬已經整得七七八八，送咗落嚟裝。先睇一下主人房個廁所，我覺得啲磚鋪得幾得意。好彩又唔洗我諗…

廚房係我嘅私人用地。因為地方細，都已經地盡其用。

師父好細心。之前外面啲紙皮石爛晒，俾著我就由得佢。但師父幫我鋪啲磚整番靚佢。

然後睇下個飯廳。大檯同鞋櫃都整好咗，但未加工，例如要加燈。比之前睇圖好好多。我成日驚會好太簡單，一餅野咁。但依家睇落都幾舒服。好彩我聽晒洛文話啫。

師父後面其實一張摺床。加一塊拉簾，之後就有機會俾人瞓。雖然唔算一個太理想嘅私人空間，但我覺得應該唔會太差。

我幾鐘意走廊嘅燈槽。感覺好舒服。

最後係書房。書檯同我心目中有啲出入。短咗些少，而個櫃就闊咗啲啲。不過諗落，用起嚟都應該方便嘅。

新年期間，我地有帶 Jayson 上過去。佢都好似好興奮咁。不過睇咗一陣，就要落去遊樂場玩。哈哈…

新年之後，工作速度好快。每日上去都有新發展。如冇意外，三月尾應該可以搬入去啦。好緊張呀！！！



~ Lindberg