摩星嶺道落山王

落山道之上，大家都等緊起跑燈亮起嘅一刻。呢條賽道我行得好熟，所以信心十足。排頭位嘅我，雙手緊握住方向盤，令手心都有啲冒汗。引擎發出隆隆巨響，我入定一波，當紅燈轉為綠燈嘅一刻，就準備放開離合器。但眼尾見到右邊身突然閃出一架紅色嘅烈火戰車，速度好快，令我不窒禁咗一窒。

我曾經講過：「冇人可以喺我前面！」（其實係動畫《我要衝線》入面，男主角嘅口頭襌），所以立即一支箭咁追上去。

落山道于迴曲折，以為可以追得近嘅時候，轉眼間入一個左右彎，對方嘅車尾燈都見唔到。心諗… 莫非時運高，又見到好似上次嘅亡靈快車。

喺佢身影消失前嘅一刻，我見到佢嘅車牌。好奇怪嘅單一個字… 一個好大個…黃色嘅「M」字。我明白啦… 日本秋明山有朝朝送豆腐嘅「落山王 86」，莫非佢就係不停密密送老麥嘅「摩星嶺道落山王麥麥送」…

果然猛虎不及地頭虫。著住拖鞋都可以快成咁。但話雖如此，心裡都有些少慚愧。

近排有少少想換車。想換一架安全啲嘅車，話晒架車雖然保養得好好，但都已經十幾年車。不過 Jayson 媽唔俾。佢話要換，只可以換四門 Type-R…。佢好鐘意佢嘅外表（莫非就係因為咁而看上咗我…）。但發咗咩？！而且，如果第二時入學面試，老師問 Jayson：「你爸爸揸咩車呀？」Jayson 答：「飛仔車！」咁點算呀？！



~ Lindberg