Percy Jackson 波西傑克森

因為睇咗電影嘅預告片，覺得《Percy Jackson & the Olympians: The Lightning Thief》好有趣。又因為知道自己冇可能有機會入戲院睇，所以我以極速睇完佢本書。

對於希臘神話，其實認識唔算太多。大部份都係睇《聖鬥士星矢》學番嚟。其次 Jayson
媽本身都有啲興趣，屋企都有一本半本書。而最大嘅資料來源，當然係來自火羽啦。

起初睇本書嘅時候，我一路睇一路鬧，差啲想放火燒書。主要原因係商業味道同抄襲成數好高。基本上係另一本 Harry Porter，再加啲 Da Vinci Code 嘅原素，增加可信性。主要角色同場景可以話同 Harry Porter 一模一樣。男主角喺屋企同學校都唔開心，有兩個朋友，其中一個係醒目女，另一個係有啲傻氣。人地有魔法學校，佢有夏令營。運動比賽更加唔少得啦！而兩本書都有個壞人，等住番生。死未？

但我唔會真係話佢抄襲，因為冇得話邊個抄邊個。講得好聽啲，佢只係將一啲令目標讀者有共鳴嘅原素放入去，同打遊戲機用「公式 Formula」一樣，做出一本暢銷書。要恨，只好恨自己點解寫唔出。唉…

故事起初覺得個真係怪怪的。一來因為以上嘅理由，印象麻麻。而且故事編排唔係太順暢。啲野會無端端走出嚟，就覺得好似一早寫咗一大堆不關連嘅橋段，為咗唔想「浪費」，或者想「演野」，夾硬加插晒落去。睇得好唔暢快。

但睇睇下（其實已經近尾聲），竟然漸入佳境。結局仲出奇地唔錯喎！雖然一早已經估到邊個係衰人，但除咗仍有驚喜之餘，後半部嘅情節同鋪排都做得好好。非常緊張刺激。

跟住我就以光速完成埋佢第二部：《Percy Jackson & the Olympians: The Sea of Monsters》。超好睇！完全放唔低本書。一來對啲人物已經有咗認識。二來故事非常順暢，情節一浪接一浪，非常緊湊。結局仲睇到我拍爛手掌！

曾幾何時，我都有懷疑過自己係波塞頓個仔。並非因為我老豆有支三叉戟（佢通常用只會用筷子…）。而係……手汗多。（唔準笑！）自信天生我材必有用，我應該有控制大海嘅能力。但好快就發現，我唯一可以控制到嘅，就係沖廁所嘅鹹水。唉…



~ Lindberg