後鏡驚魂

上星期六係我地搬屋嘅大日子。我地一早起床，然後將 Jayson 送過婆婆到。除咗屋企七國咁亂之外，我地亦需要多一朝嘅時間，專心收拾埋啲野，等搬運公司下午幫我搬。

婆婆話要同公公去飲茶，於是我就開車接佢地同 Jayson 一齊去酒樓。落車之後，Jayson 見爸爸媽媽都唔落車，所以開始有啲扭計。婆婆有見及此，就抱起咗佢，慢慢行入商場。我見無乜野，就開車掉頭走。喺倒後鏡上面，見住兩婆孫準備行入商場。就喺呢一刻…

婆婆跌低咗！依我從後鏡所見，婆婆向前失重心，推開咗商場嘅玻璃門。然後頭就撞埋去另一邊門嘅門邊到。我立即喝 Jayson 媽落車。慌忙中，我唔記得停車。Jayson 媽喝問：唔停車點落呀？停車之後，Jayson 媽又慌忙中唔記得關車門。倒後鏡中，我見婆婆爬喺地上，手中仍緊抱住 Jayson。但最終都輕輕放低咗佢。而 Jayson 當然就繼續喊啦。

因為開住車門，我用我嘅超技術，勉強泊好車之後，就落車睇下情況。婆婆坐喺地上，頭破血流！佢用公公俾嘅手巾按住傷口，好彩神志清醒。而 Jayson 著好厚衫，所以應該冇被玻璃門所傷。Jayson 媽立即打 999。等車期間，有不少途人及茶客問候，而商場亦有保安員加以協助，令救護車可以嚟到正確位置。

原來行人路比商場地面低咗少少，相信係行人路鋪磚之後，下陷咗少少。抱住 Jayson 嘅婆婆，因為睇唔到路，所以不幸摔倒。其實婆婆通常都唔會抱 Jayson。如果佢瞓咗而要返學，都會叫公公抱落樓。而我地都經常同 Jayson 話，婆婆（同媽媽）冇力，唔抱㗎，要抱就搵爸爸（雖然我都唔見得有力…）。今次一抱就出事。唉…

救護車好快嚟到。經醫護人員睇過，傷口有如「二郎神開第三眼」一樣，但已經止咗血。婆婆唔見頭暈，手腳亦都冇事，我地個心先定番啲。跟住公公就陪婆婆去醫院，而 Jayson 就同我地返屋企。因為要睇住 Jayson，Jayson 媽就打電話俾 Jayson 舅父，叫佢睇下公公有冇野要幫手。

到咗醫院檢查後，好彩都冇乜大礙，即日出院。但傷口就縫咗五針。聽到都感覺痛。

出院之後，婆婆好擔心咁同我地講，話怕整親 Jayson。其實我地冇乜擔心過佢，因為見佢行得走得。如果 Jayson 整親，我地當然會心痛。但如果婆婆因為 Jayson 而整親，我地咪仲更加心痛。Jayson 媽上車之後就忍唔住喊，叫 Jayson 以後唔好扭計，要婆婆抱。

希望公公婆婆身體健康，長命百歲。雖然佢地覺得湊 Jayson 開心，但都唔希望見到佢地太辛苦。所以我成日同 Jayson 講，大個之後一定要孝順公公婆婆。唔係就唔抵錫啦！



~ Lindberg