新居大改造 之 快將完結篇

終於接近尾聲。先睇大門。我選擇嘅，簡簡單單。佢有個外號，叫做「置富型」。唔知同置唔置到富有乜關系，我相信係人地「置富花園」用緊囉。

一入門口，有洛文幫我地喺宜家買嘅裝飾燈。好靚…。唔開都睇得下。

廚房嘅爐具都裝好晒。因為未有雪櫃，所以睇落好似幾多寬敞。

飯廳燈都係洛文買嘅。亦係宜家貨色。點解自己行又唔覺有啲咁嘅野呢？

基本上，乜都係洛文話事。我地只係負責買梳化同餐檯椅，因為如果造，佢話一來唔平，二來未必啱坐。但雖然只係兩件野，都差啲玩死我地。首先，我睇中一張 Muji 嘅餐檯。好貴，但我鐘意佢夠簡潔耐用。點知原來要訂！日本游過嚟要一個半月！原本想搵過第二張。但最後都放棄，只好訂呢一張。

而梳化就仲大鑊。原來梳化係超難買！想搵一張合心水嘅，行到腳都跛。因為我地個廳只有 1.8 米闊，正常只放得一個兩坐位。Jayson 媽想要嘅貴妃椅注定冇行。正當心死之際，我話不如上 Franc Franc 睇下。其實我唔知佢有乜野賣。上到去，竟然俾我地搵到張「好野」。

第一：1.82 米有三座位。
第二：有貴妃椅。
第三：夠硬，唔怕坐壞腰骨。
第四：可變身成一張普通三座位加一舊野放腳。一流！

但嗰隻綠色有啲難接受，因為全屋都冇呢隻綠。佢有另一隻深啡色，但冇現貨。如果訂，要等兩個幾月！件貨要先由大陸去一去日本，打一個轉先嚟香港。問佢可唔可以直接由大陸過嚟，咁就當然唔得啦。死未？！最後，原來 Jayson 媽覺得隻綠色可以接受，所以我就要咗張現貨。望出外面個山，都襯嘅…。

客廁。起初擔心個（幾鬼貴嘅）花灑組合唔夠位裝。但好彩最後都裝到。雖然係客廁，我相信我會幾經常喺到沖涼。

條「晾衫竹」真係迫不得已先裝落去。唔裝真係唔知點晾衫。天花有部乾衣寶。除咗可以抽濕，仲可以放下熱氣（不過唔會好暖）。我玩過一下，未知好唔好用。

而最擔心都係個星盆。因為位置極之有限，所以買咗個現成嘅星盆。一直我都覺得唔太啱心水。但洛文話可以，只好信佢。點知裝咗之後又真係唔太差喎。嘻嘻…

又再講一講個師父。佢真係幾好呀（雖然都唔平）。有日我上去，見到無端端廚房搭咗個棚做野。問番原來師父發現廚房有臭味，後來發現上一手將地渠同星盤去水倒轉咗，搞到地檯去水冇咗個隔氣！啲氣味就沖咗上嚟。好彩佢跟得足，否則我嘔死都唔知咩事…

鐵定嚟緊星期五做入伙儀式，星期六正式搬入去！到時再詳細俾大家睇下洛文幫我做咗啲乜。



~ Lindberg