紅酒燴羊膝

有晚行過 Apita，見羊膝有減價。上次想整「紅酒燴羊膝」買唔到，只係得啲切咗出嚟嘅羊膝肉。雖然都係貴過我餐廳嗰啲，不過我唔鐘意喺自己餐廳隨便攞野，所以貴啲都照買。咁就可以認真地煮一次。

材料：
羊膝 一隻
洋蔥 半個切角
蒜頭 兩塊切片
紅蘿蔔 一大條
乾迷迭香 一茶匙
紅酒 半量杯
番茄肉 一罐
雞湯 兩量杯
鹽及黑椒 適量
橄欖油 少許

因為減價貨，想買多一隻都冇。不過都幾多肉，兩個人都夠分。圖中嘅粟米，係因為前一日打邊爐用剩咗，所以用埋佢。味道係有啲唔夾，不過都冇傷大雅。有的話，其實可以落啲西芹。而番薯，係因為我見焗開野，咪煨埋一份囉。嘻嘻…

首先就用啲乾迷迭香、橄欖油、鹽及黑椒去醃下隻羊膝。

爆香啲蒜片就放隻羊膝落去。通常我都會攞走啲蒜片，否則一定燶晒。而且攞個味都夠啦。

因為羊膝個面要燒到金黃，煲野先至好味，所以我見燒得七七八八，先放個洋蔥落去。

洋蔥都金黃之後，就可以落埋啲紅蘿蔔。紅酒同雞湯都可以落埋。罐頭番茄肉啲番茄，要用手握碎先好放入去。大滾之後可以試下味，落啲鹽及黑椒。唔好太鹹，因為之後會煮走 1/3 嘅水份。但又唔好太淡，否則舊羊肉入面就唔夠味。

放入焗爐，攝氏165度焗兩個鐘。如果冇焗爐，炆都得嘅…。啲肉要軟化到差不多離骨就一流喇！

食得！



~ Lindberg