新屋的第一次聚會

我地用咗大約三個星期嘅時間，終於執好間屋。其實要拆箱將啲野放上櫃，唔洗用太多時間。但要諗下邊啲野放邊到，真係頭到大埋。淨係啲櫃入面嘅層板放幾高，都已經玩死我。即使到依家呢一刻，我仍覺得仲有好多野唔啱位。但算啦！有時間先慢慢搞。

適逢有朋自遠方來，上星期日搞咗兩個聚會。招呼一下朋友。下午，先來 Fred 哥一眾。

「好開心有姐姐同妹妹陪我玩！」

「Chloe 姐姐玩 Julie 姐姐啲玩具喎！嘻嘻…」

朋友嚟到，當然要攞啲好野出嚟大家試下！燈登登凳…貓屎咖啡！又稱為麝香貓咖啡，英文 Kopi Luwak。供應商送嘅，唔知幾錢。郭生喺到，當然要佢出手沖啦。

飲得！

味道… 怪怪的。可能因為我地磨得太幼，感覺有啲似… 糞便。但好難一次就沖得好嘅，咪當係玩下啦。

好彩 Chloe 媽蒸來好味蛋糕一個，加上我買咗啲士多啤莉，人生先冇咁遺憾。

玩咗一個下午，三個小朋友基本上係分開玩。但睇到佢地嘅唔同喜好，都覺得好搞笑。例如 Chloe 好鐘意個「O」字，Jayson 個磁石貼貼唔見咗個「O」，就不停要搵番。好彩最後都搵到。而蔚蔚就著住 Jayson 黼拖鞋（Jayson 冇著過）四圍行。

特別要多謝 Fred 哥張靚地墊！好靚！（之後影過張相先得！）

第二場就有三位「貓」人：靚靚媽、Fanny、同貓奴及其蝦子餅。一個澳洲，一個澳門，仲有一個屯門！三個都係幾千里遠嘅地方。真係大駕光臨，寒舍蓬蓽生煇。

為咗佢地，我整咗個秘製意式番茄湯底打邊爐。買咗（據稱）安格斯肥牛片、好多丸、蝦、菜等等。洗完啲野先發現，點解咁少野食嘅？！以前我地打邊爐會買好多野，但後來發現都只係鐘意食牛，所以簡化咗。但朋友上嚟，點可以咁寒酸呀？！

好彩佢地一開始就話鐘意牛肉同蝦。而啲蝦我又好有挑走啲腸，誠意搭夠。哈哈哈…

「爸爸，我要影。」

「…」

都唔錯喎…
當時大家已經飽到上心口。靚靚媽同貓奴不停去搞 Julie，搞到佢啲毛鬆起晒。Julie 唔理 Fanny，但 Jayson 理喎。咁都算冇得失啲客人。哈哈哈…
甜品係佢地買嚟嘅 Awfully Chocolate 的原味朱力餅。原本大家都話好飽，唔食。但我裝飾得咁靚，而且個蛋糕都唔係好滯，食完一件又一件！

大戰過後，都唔算好多野洗。我自己就好開心，希望其他人都係啦。好多謝大家嘅蛋糕同紅酒，等我有得偷酒飲。靚靚媽，妳仲有三罐青島喺我雪櫃！唔該快啲番嚟清咗佢，否則收存倉費！！！哈哈哈…

~ Lindberg