夜宴

前晚契爺同一班朋友上嚟玩。我第一次全力去用個廚房。用起嚟都幾得心應手，但因為太耐冇練習，而且要整俾十三個人，所以煮得未算好滿意。

是晚餐單：
Parma Ham with Melon起初以為冇技巧。但原來要切咁多蜜瓜，同埋包咁多塊火腿，都幾大鑊。

Caesar Salad with Bacon Bits and Garlic Croutons
好簡單。

Drunken Chicken Wings
之前諗住燒個香草雞翼，但驚住會按排失當而出事。呢個就簡單、方便、安全得多。

Tiger Prawn in Anchovy Pesto Cream
道理上係爆香啲油浸鯷魚、香草醬、同辣椒，落蝦同白酒、調味。但攞咗出去見碟野怪怪的，原來唔記得落香草醬同辣椒。好彩都有味。「執碼」果然係一個好重要嘅任務。

Vegetables and Three Cheese Stuffed Seashell Pasta
呢個真係手工菜。以前我整過類似嘅菜，Jayson 媽話好好味，但之後佢都冇口福再食到。因為太麻煩。相信呢個菜亦都會係一樣，只此一次。所以食到嘅朋友真係好好彩。哈！首先要切好多粒粒，包括：洋蔥、茄子、磨菇。仲有菠菜切蓉。分開調味炒熟，然後攤凍。之後加入 Ricotta 及 Mozarella 兩隻芝士。再釀入一隻九成熟嘅貝殼粉入面，然後一隻隻放喺茄汁上面。最後放啲 Mozarella 同 Parmesan 芝士上面焗。幾驚唔好食呀！唔好食的話，我一定會發癲！

Grill Prime Rib Cube
因為冇地方俾大家切，所以切成大大粒。肉厚又多汁嘅美國安格斯肉眼扒，原本驚大家已經食飽，所以只係煎咗三分一。最後當然全部（四磅半）煎晒啦。好味！

Italian Meat Balls on a Bed of Linguine
失敗。啲粉焗得太熟，同唔夠汁。

Crispy Chocolate Ice Cream Bar
好彩之前買咗一打朱古力脆皮。

Hot Iron Buddha Tea
啲野都幾滯。有杯茶落肚會舒服啲嘅。

冇食物相，因為掛住煮、掛住食。之後洗大餅洗到一點幾。不過都唔算好麻煩。

最後，多謝各位朋友俾面光臨，亦要多謝大家啲美酒。大家唔洗擔心我冇得食，因為「近廚得食」。啲餸未出廚房，我已經食咗最新鮮嗰舊，大家都只係食我口水尾。而且我煮得好開心，見到大家食得開心，我就更開心啦。呵呵呵呵呵呵…


~ Lindberg

P.S. 下次邊個整污漕我塊木地板，除咗要有「死」嘅覺悟之外，仲唔好問我攞布。請用自己條脷抹乾淨啲紅酒漬！唔該。