三國喜歡的人物：夏候惇

講到三國演義嘅人物，大部份人會諗起劉、關、張三人。打慣三國無雙嘅朋友，可能會喜歡呂布（Jayson 媽鐘意用外表冷酷嘅曹丕）。而喺故事之中，我就喜歡：夏候惇。

夏侯惇，有「盲夏侯」之稱。因為喺一場戰事中，佢被曹性放冷箭，射中左眼。夏候惇跟住就將箭同眼珠一齊拔出，大叫一聲：「身體髮膚受之父母，不得捨棄」，然後一口吞咗粒眼珠，再跟手一刀將曹性劈死。讀書嘅時候讀到呢一幕，只可以用「震撼」同「型爆」去形容。但依家做咗人爸爸，又有另一番感覺。

「身體髮膚受之父母」係出自《孝經》中嘅：「身體髮膚，受諸父母，不忍毀傷，孝之始也。」意思係……明啦！我鐘意見到古時嘅中國人，對孝義嗰種重視（但亦可能只係因為封建思想所規限）。從微細嘅事情當中，例如頭髮，已經蘊藏住對父母嘅尊重。

我冇期望過 Jayson 第二時一定會尊重我，或感激我地生咗佢出嚟，因為自己都曾經喺唔如意嘅時候（尤其是追唔到女仔嗰陣），埋怨過自己父母。但如果 Jayson 可以好似夏侯惇咁愛惜自己，我都已經心滿意足啦。



~ Lindberg