賣樓記

大約兩個月前，我搵咗地產代理幫我放層舊樓出去。原本諗住等我地搬咗之後，執一執間屋先至賣。因為住咗十年都冇執過，啲油漆真係幾恐怖。但地產話無乜關系。

而我心諗賣得到好價錢咪照賣囉，試下都無防。

起初我以為會有好多人睇。點知都係小貓三四隻。我估主要原因係貴。雖然環境好，方向正，但即使俾著我自己，都覺得貴。但銀行估值估得到，我又唔係急住賣。而且即使唔賣或唔租出去，我都頂到一年半載嘅…。冇理由唔等下啫。

第二個星期，再有兩隻小貓上嚟。一個男人聲稱住我樓上，想買埋樓下，上下呼應。之後經紀話對方好有興趣，但要平啲。而如果佢買唔到我呢層，就會放埋佢嗰層出去，之後搬個大單位一家人住。因為佢係上幾層同一個單位，經紀話到時我嗰層嘅價錢就會受壓啦。

起初以為以我咁嘅形勢，實唔怕俾人壓價。點知到頭來都係俾個經紀壓一壓。雖然最後都賣到一個唔錯嘅價錢，但期間真係有啲唔舒服。

正如張五常於《賣吉者言》所講，經紀唔係幫買賣雙方，或是但一方。佢只係幫緊自己，完成交易，收取佣金。佢對層樓賣平啲貴啲，根本不在乎。當佢有晒雙方同市場嘅資料，佢會用佢嘅方法去速成交易，而未必係是但一方嘅最佳利益。我個經紀好成功做到呢點，亦都因為太成功，令我頂住道氣。

雖然間地產代理係朋友個阿哥開嘅，我都曾經有懷疑過經紀同我講過嘅野。因為對方實在係太有錢。除咗穿金戴銀之外，佢可以唔洗做按揭，過幾日又話要買半山一層樓。所以我覺得佢唔似會住我樓上。而且咁有錢，就無謂壓我嗰幾萬蚊啦。不過最後都證實咗個最後用家真係住我樓上。幫佢俾錢嘅先生…我就唔知同佢有乜關系喇（聲稱係夫婦…）。

賣咗層樓，當然好唔捨得。但我覺得以現時嘅經濟，好難搵到本地人接我個單位，所以都幾慶幸有個咁嘅買家。而我地可以用啲錢嚟找裝修筆數，仲有個錢防下身，安安樂樂住新居，時機都對我一家不錯呀！嘻嘻…



~ Lindberg