現代夏候惇

前日提到夏候惇，其實係因為一個婦人。此婦人喺 Lee Hall Canteen（正確名稱：香港大學學生會餐廳）任斬燒味一職（見下圖）。一日，友人見佢斬斬下燒味，一野斬咗落自己隻手指尾到，血流成河。但佢仍面不改容，繼續斬埋碟燒味，送到同學面前。非常之有專業精神。自此之後，佢就得咗「夏候惇」呢個稱號。不過佢再冇斬燒味啦，只係做叫單一職。

問過友人，其實如果咁嘅情況，佢唔係應該似關二哥多啲咩？關二哥忍痛出晒名啦（關雲長刮骨療毒）。但原來友人們一直認為 Lee Hall Canteen 係邪惡嘅象徵，所以入面嘅人都係「曹賊」。哈哈哈哈…

其實稱 Lee Hall Canteen 為「曹賊」，真係唔算過份。因為啲野真係唔算好食，而且配搭又奇奇怪怪。不過平平地，唔可以要求太高啦。而且佢亦為我帶來唔少回憶。每朝返完早堂，都例必去食一個早餐，然後午餐。唔好彩的話，仲會有茶餐…。

而當年喺飯堂食野，對身體都算係一種考驗：

1) 高鈉：唔條宫崎骏嘅《高立的未來世界》嗰位高立，而係 Sodium 嗰個鈉，四腸早餐是也。一份早餐就食四條高鹽度香腸，真係一個經典。當時我地因為貪佢有啲燒汁，經常都會叫嚟食。而作為生化系嘅學生，好明顯我地對健康不太重視。

2) 高鐵：唔係要拆人條村起嗰條，而係加料嘅外來物質。例如魚鉤之類。但我都只係見過未食過。

3) 少菜：碟頭飯通常會跟幾條豆角。問題係生到好似未煮過一樣，非常難入口。有次同學向燒味師父表示太生，唔洗俾佢喇。師父一手揸住一大束，好惡咁對佢講：「話我啲菜生？！食你一世都願呀！！！」俾人用一束豆角指住個頭咁鬧之後，我再冇見過呢位同學食豆角…
自從畢業之後，飯堂已經轉咗唔知幾多次手。現時其實即係大家樂。不過仍然可以保持到過往嘅「作風」。真係難得…難得……。

過多幾個月，為咗擴建校舍，飯堂就要拆啦。相信呢啲永遠都會喺我地一班舊生嘅回憶。



~ Lindberg