菜刀劏原條吞拿

事源一班同事去咗南海嗰邊釣魚，釣咗好多吞拿魚同紅鮋。於是大廚就攞咗一條黃鰭吞拿魚送俾我。條魚有我成條手臂咁長，發達！

起初我以為佢會好似上次咁劏埋俾我。但原來條魚新鮮到劏仲未劏！只係放咗血… 聽佢口述劏魚方法一次之後，加上之前睇過一場「吞拿魚解體秀」，我就膽粗粗決定自己出手。

起初都掙扎過，好唔好返自己屋企搞，但因為時候唔早，唔想 Jayson 等，所以直接攞去婆婆屋企處理。但同我擔心嘅一樣，婆婆冇刀，只有一把菜刀…。

Jayson 舅父話：古時有「關雲長月下釋貂蟬」，今日有「Kidad 王菜刀劏吞拿」。（雖然兩者冇乜關系，但我覺得舅父講得幾好笑。哈哈哈…）

婆婆幫我磨利咗把刀，總算插得入。好過「某人」屋企啲刀，又唔利，又冇得磨。哈哈哈…
劏大魚嘅道理，係魚身打橫一刀，起上下兩塊肉。如是者，反轉做多次。

講就好似好簡單…。我幾經辛苦，劏到手都震埋，終於起晒四舊肉出嚟。但因為係菜刀，而且冇經驗、手勢差，都唔算起得好乾淨。好彩條魚夠大，一定夠食！

之後 Jayson 舅父就幫手，同我一齊用鉗拔起啲魚骨。主要都只係魚腩位有幾條骨，都唔太難。

起埋骨之後，就可以起皮。但因為我把菜刀冇彈性，又重又冇曲線，所以好難起魚皮。諗番起街市劏魚嗰啲魚販，好多都係就咁用把大刀。手起刀落，真係非常刀法如神。

劏魚嘅場面其實都幾血腥。雖然已經放咗血，但都仲有啲污漕野。枱布我都換咗三次！之後就用啲熟水洗一洗四塊魚，就可以切件。到呢個時候，我已經冇力再企。於是就搵張櫈坐低慢慢切。

切完之後，自己立即食番塊。好好味呀！雖然冇大吞拿魚嘅肥油，但魚味好鮮，肉質好彈牙，一啲都唔腥！同餐廳食到嘅好唔同。

是晚我地六大兩細，食咗半條魚。Jayson 都好想食，我就用啲滾水沖咗啲魚幾次。

點一點豉油，食得佢津津有味。而表姐都食咗好幾件。最重要嘅一點，就係大家都冇肚痛！哈哈哈…

我已經落咗單。下次要一條真鯛！呵呵呵…



~ Lindberg