台式珍珠奶茶

近年台式珍珠奶茶又開到成行成市。前日，我喺灣仔電腦中心附近試咗呢間新店嘅「白珍珠奶茶」：

老闆娘問我：「洗唔洗少甜？」我一時意氣，以為佢見我嘅身型先咁問，所以我話：「唔洗！」收咗錢之後，佢解釋話佢啲飲品特色係比較甜。如果太甜，可以叫佢整過。我好豪氣咁話：「唔怕！」

點知真係好甜。白珍珠同黑珍珠冇乜分別。係細粒啲，冇乜味，不過都幾好咬口。最後因為真係太甜，我又唔想同我個胰臟作對，所以只能飲到大半杯。

眼見四周圍都賣珍珠奶茶，大部份生意都唔錯。而我公司班同事，就好似上咗癮咁，唔飲唔得。每日都要飲一大杯。當我決定咗要搬寫字樓之後，班同事第一件關心嘅事，並非新寫字樓點樣去，而係附近有冇珍珠奶茶賣…。

我覺得今次呢股「珠奶」熱潮，同好多年前「快可立」嘅時代好唔同。應該可以延續落去，因為從幾個做得特別好嘅品牌，可以睇得出：

1. 整個包裝靚好多，專業好多。相比以前啲「快可立」，雖然飲品本身和器皿都冇乜分別，但舖面裝修和餐牌嘅設計，甚至乎顏色嘅配搭都做得好好。除咗感覺專業啲，飲佢啲野，人都會覺得醒啲。
2. 產品具質素。雖然啲飲品都係用啲唔知乜野粉溝出嚟，但勝在穩定。以前有啲連珍珠都做得唔好，叫人點飲呀？
3. 價錢適中。十蚊一大杯凍飲，比起 7-11 或 OK 嘅樽裝飲料只係貴少少，但俾人嘅感覺就新鮮造，同有誠意啲。加上星巴克多年嘅「教育」，相比二三十蚊一杯奶水，十蚊一大杯嘅凍飲，好多人都樂意俾。
4. 但最重要都係… 地球越嚟越熱，真係需要冷卻一下啦。

~ Lindberg