嫲嫲七十大壽

原本記得阿媽生日已經好難得，當我正打算安排一家人食餐飯，Jayson 媽屈指一算，原來今年阿媽七十有一！正所謂人生有幾多個十年，當然要搞一搞佢。於是我就打電話俾老豆商量一下。

「阿媽今年七十一喎，洗唔洗搞搞佢？」

「得啦，我會安排。」

「你會？！得唔得㗎？」老豆平時出街食乜都唔肯出主意，好出奇地今次會攬上身。

「得啦，我會安排。」我開次有啲滴汗，懷疑自己打錯電話…。

「咁食乜呀？」

「得啦，我會安排。」

「搞唔掂出聲喎。」我好擔心咁問多一次。

最後，阿爸訂咗喺屋企附近一間酒樓，簡簡單單兩圍枱，同一班親戚慶祝一下。（不過啲野都係要阿媽決定…）

為咗隆重其事，Jayson 媽提議打一對金壽桃。雖然用途係冇乜，但勝在好意頭，而且都係嗰句：人生有幾多個十年啫。都想阿媽收到禮物，開心下嘅。

但金桃都不如呢個孫氹得嫲嫲開心。

而全晚最開心，竟然係 Jayson 喎。佢收到一份比金桃更貴重嘅禮物，就係 Woody 同 Jessie 喇！

「乜咁客氣呀？嘻嘻…」

起初我堂家姐只係送咗一隻 Woody 俾佢。但後來發現原來佢咁鐘意，立即使人返屋企攞埋 Jessie（應該係公司啲貨板）俾 Jayson。發達！

「究竟今晚搵邊個同我瞓好呢？」

生日當然要有生日蛋糕啦。我買咗一個，堂阿嫂又買咗一個。好彩兩個都係細細個，唔怕食唔晒。

切過生日蛋糕之後，希望阿媽身體健康，食得又瞓得，福如東海，壽比南山！

~ Lindberg