乾炒牛河

有一個星期六，我行街市買餸煮午餐。見到有河粉賣，心血來潮就想挑戰自己，整碟乾炒牛河。

乾炒牛河呢個菜式，真係一啲都唔簡單。先撇開要炒出一碟唔爛唔油嘅河粉有幾難，淨係入面看似普通嘅配搭，就已經可以帶出不同味覺同口感嘅刺激。

味道方面，有洋蔥嘅甜、牛肉嘅肉味、老抽嘅鹹、韭王嘅香。本人係唔食蔥，韭王仲要係打死都唔食。但曾經試過食乾炒牛河唔落呢兩樣野，結果係超難食，原全唔係嗰回事。但喺屋企自己炒，點都唔會落韭王。對於韭王，我掂都唔想掂。因為有童年陰影。而老抽因為屋企太少用，亦用瑞士汁代替。

而口感方面，有河粉嘅滑、牛肉嘅咬口、同埋芽菜嘅爽脆。提到芽菜，原來搣芽菜都有啲技巧。就由節瓜俠示範一下如何搣芽菜 ：

結果，我有四分一都係一啲好碎嘅芽菜…。但芽菜嘅重點係要自己搣，因為自己搣先可以挑到啲老嘅出嚟。用刀切係分辨唔到。

其實我都唔係好識炒。做呢道菜式，本人覺得水份控制係好重要。因為水一多，河粉就會太腍。我嘅方法係每樣都分開調味同炒，最尾先炒河粉。咁每樣材料嘅生熟程度都可以控制得好啲，而河粉又唔怕吸收得太多其他材料嘅水份啦。希望下次會炒得更好！

「Jayson，好唔好味呀？」

「當然好味啦！我都有幫手喎！」

~ Lindberg

P.S. 個影片都幾長。不過我覺得幾搞笑，所以都冇乜剪到。嘻嘻…