朗文英文故事共讀課程：超鼠系列（一）

最近收到網友 Catherine 送嘅兩套書，俾 Jayson 試讀。佢並且想我喺到分享一下讀後感。Jayson 有得玩，我有得寫，何樂而不為。

Super Mice Series 超鼠系列

起初見到呢個共讀課程，係俾 4 - 6 歲嘅小朋友。Jayson 得嗰兩歲半，都擔心會唔會深咗啲呀？正想彈返俾 Catherine 之際，都係睇下套書有啲乜先啦。每一套 Super Mice 有一本故事書、三語製作雷射 CD、三語製作 VCD、互動學習二合一光碟及彩色識字圖卡。整個系列共有8套故事，而佢送咗其中兩套俾我：《Let's Make a Zoo》和 《Too Many Kites》。

起初嘅感覺，佢只係一本教語文嘅書。但睇番簡介，原來又唔係咁普通喎。每套書以教語文為基本，再分別集中喺不同嘅學習範疇。《Let's Make a Zoo》係藝術，而《Too Many Kites》就係講數學。

自己睇過一次之後，其實都深淺由人。喺現階段，講幾多，教幾多，都係大人決定啫。而且 Jayson 冇啲咁嘅書。就即管俾 Jayson 玩下啦。

經我再三審查過兩再套書之後，我決定俾《Let's Make a Zoo》佢睇先。《Too Many Kites》係數數目。Jayson 近排數得太多，所以我地想培養下佢嘅創意和想像力。《Let's Make a Zoo》係講三個學生，喺老師嘅帶領下，用不同嘅物件（例如繩、水樽、顏色筆、圖畫紙、羽毛等）整一個動物園出嚟。加上係講返學啲野，我地希望可以從中提高 Jayson 對返學、學習、和社交嘅興趣。

以下係網友想我同大家分享一下嘅問題：
1) 當小朋友收到 Super Mice Series 時，有什麼反應？
仲洗問？當然興奮啦！收到禮物當然開心啦。而且 Jayson 一向都鐘意睇書。

不過，起初我真係驚 Jayson 唔鐘意。學習語言俾我嘅感覺係好悶，尤其是唔知一個兩歲半嘅小朋友會有乜反應。但佢睇完一次就立即叫我讀多次，可見本書都做得幾吸引。

2) 請分享與小朋友使用 Super Mice Series 的過程。
因為 Jayson 未識自己閱讀，而且學習語文都只係喺起步階段，串字識字好似真係早咗啲，所以我將重點放喺故事上。首先，我跟 Jayson 讀故事書。

故事完咗之後，仲有啲生字表、配對遊戲、同埋一個字母旋轉盤（Dialing Machine）。第一次玩字母旋轉盤，自己都以為變緊魔術！串啱個字，一打開就知自己串得啱唔啱。

之後我就同佢玩彩色識字圖卡，即閃卡也。啲圖片同書上嘅生字表一樣。因為我唔需要佢學串字，而且啲物件佢都已經識晒，所以我都只係同佢玩咗一次，之後都冇同佢再閃。但啲卡都做得幾好，夠晒大張。用嚟周圍貼都得。等大個啲之後再攞出嚟玩啦。

隔咗一個星期之後，我先播 VCD 俾 Jayson 睇。等咁耐，因為我起初有啲抗拒播。我覺得入面都係故事書啲野嚟啫，我自己講咪仲生動。但原來又唔係喎。除咗發音標淮，動畫仲可以加強對事物嘅解釋。例如我想同 Jayson 解釋可謂之繩（rope），但本書上面得一條野，成間屋又搵唔到一條實物，有動畫就最好不過。

VCD 入面有三種語言（英文、普通話、廣東話）嘅版本。除咗講故事之外，仲有教生字同唱歌仔。Jayson 一口氣睇晒三個版本（其實係唔俾我地停…）。佢好鐘意隻歌仔，後面啲三語生字竟然又讀得幾好喎。下次放段片俾大家睇下。

其實仲有一隻電腦光碟。不過入面個程式係 PC 版本，而我係用 Mac 機。等佢大個啲先自己玩啦！

3) 請分享 Super Mice Series 有什麼吸引小朋友的地方。
先講故事書，我覺得作為一本兒童故事書，顏色鮮豔好重要。故事要簡單，尤其是對 Jayson 咁細嘅小朋友。但亦要有地方可以吸引到小朋友，例如有可以移動嘅組件。

附加嘅不同形式活動。除咗有得玩之外，仲可以俾小朋友重溫一要故事中嘅得著。而最後嘅字母旋轉盤，雖然對太細嘅小朋友冇乜作為，但其實 Jayson 已經開始串下字，例如自己個名。俾佢知道原來自己學啲 ABCD 係有咁嘅用途，從而提高學習嘅興趣，都未嘗不可。

而隻 VCD 亦都唔錯喎。起初我都有啲抗拒，因為細細個就要學咁多野，好似好慘咁。但佢又真係睇得幾開心，跟住讀、跟住唱喎。整個故事唔係太長，所以可以保持小朋友嘅集中力。
但可以的話，唔該出版商可以做成 DVD。對大人嚟講，感覺上好似好啲。但質素對小朋友可能都冇乜所謂嘅。

（待續…）



~ Lindberg