北海道親子之旅：小飛機篇

約咗契爺契媽喺香港站等。我地行李有一大一細箱、一個背囊、同一架輕巧啲嘅手推車。雖然都已經盡量輕便，但都仲有好多野要帶，個大箱有成二十幾三十磅。奶粉入落密實袋，玩具圖書沖涼液又唔少得。好在今次我冇帶大機，只有 PEN、Horizon、同 ZS3。

上到飛機坐好之後，就有人派小禮物俾小朋友。入面有一個米奇手提袋、畫筆畫簿、貼紙飲管等。不過我發現只係去嗰程有，回程竟然冇野俾佢玩！洗唔洗咁吝嗇呀？

起機嘅時候都幾擔心，怕 Jayson 驚驚。但又冇乜野喎，因為佢嚟咗個小睡片刻…

唔知係唔係太過興奮，加上係佢早睡時間，Jayson 不知不覺就瞓咗。但當然瞓得唔好啦，飛上半空就醒咗。空中先生（有人望到眼金金…）先俾一份兒童餐俾 Jayson。呢個安排唔錯，因為我地可以全力搞掂佢，之後我地先慢慢食。不過佢對個飛機餐冇乜興趣，只係食咗啲麵包，同幾粒米。因為我地手忙腳亂，竟然一張相都冇影到！而且契爺又坐得好遠，所以冇人幫手。

之後我地就開始睇電影。舊式嘅影音系統，冇視訊自選節目，佢有乜就要睇乜。Jayson 得《花木蘭》睇，悶到佢抽筋，成日搞住佢阿媽。我睇咗套《Clash of the Titans》，都幾好睇。

套戲得兩個鐘，但整程機就要四個半鐘！仲有兩個鐘都唔知做乜。Jayson 玩我嘅電話，我玩我嘅手指。

醫生同婆婆都提我地，起機降落都要記得飲水。對小朋友，要飲水先可以保證幫耳仔減壓。但 Jayson 落機先又嚟瞓！因為飲唔到水，佢不停整自己隻耳仔。我只好幫佢按摩下。我自己試過，叫做好過冇…

終於著陸。整程機，Jayson 雖然唔算開心，但都好乖，只係叫我同佢去行過兩三次廁所。之後我地就懷住興奮嘅心情，行入呢個今年三月先開嘅機場國際新翼。

（待續…）



~ Lindberg