北海道親子之旅：親子樂園篇 之 滝野鈴蘭丘陵公園

因為係《親子樂園篇》，所以我決定由 Jayson 自己講番…

「9:00am 左右，我地離開酒店去滝野鈴蘭丘陵公園玩。媽咪話 米B 之前都嚟過玩，所以我好想去睇下。」

「車程都幾長，大約要半個鐘有多。睇下對面個哥哥瞓咗就知。」

（從地下鐵南北線札幌車站到地下鐵南北線的真駒內車站：20分鐘抵達。大人280日圓。）

「因為冇乜好做，唯有影下自己對腳解下悶。」

「出咗地鐵仲要轉巴士。好彩我地時間夾得好，唔洗多等。媽咪記錯中央口落車比較近兒童遊樂場，其實係東口落車方便啲。不過都冇乜所謂啦！行五分鐘左右，就到公園入口。」

（從地下鐵真駒內車站到瀧野公園:搭乘巴士30分鐘。搭乘中央巴士「瀧野線」於「鈴蘭公園東口」下車較便利。大人430日圓。）

「入場費只係400日圓，爸爸話都唔算貴。而我一入去見到咁大個公園，當然興奮若狂啦。」

「同爸爸媽咪影張合照先…」

（契爺啲 Nikon 機好差，影到人好肥。叫咗佢換機㗎啦！）

「之後契爺、契媽、爸爸見到我身後啲花之後，就一支箭咁飛咗去影花。原來由中央口入，雖然要行一條大斜路，但入口環境好靚！啲薰衣草仲係我地全個旅程見過最靚嘅添。」

「睇下契爺幾認真！」

「啲相影得幾靚！但媽咪話爸爸唔俾心機影，冇功課交。真係唔乖！」

「啲花真係好靚，再加上公園好乾淨舒服，天氣又好好，行步路都精神啲。」

「呢個公園聽講話有飛鼠。但我就見唔到。爸爸後來就買咗一隻好可愛嘅飛鼠公仔俾我。」

「睇咗好多花花草草之後…」

「終於嚟到我想去嘅遊樂場：こどもの谷（兒童之谷）！首先嚟到一個螞蟻屋企。裡面可以向上向下行。上面係一個塔，而下面係一個地道迷宮。」

あり塚の塔（螞蟻塚之塔，光與風與水之精靈嘅屋企。入面有光同風由洞口進入，又有流水嘅小水池，非常貼題。）

「向下行就係螞蟻做嘅隧道，十足十一個迷宮咁。」

ありの巣トンネル（螞蟻之巢隧道，對大人嚟講都幾難行，因為有啲地方要爬先穿得過。但 Jayson 當然玩得好開心啦！）：

「而最好玩，係屋頂嘅一條滑梯。滑梯用石做，又高又斜。我堅持要玩，但契媽發現唔夠闊陪我一齊滑落嚟。最後，我膽粗粗自己一個滑落去！」

「雖然我個樣好似好驚，但其實真係好好玩㗎！」

「離開螞蟻屋企之後，見到一個好大嘅蛋白物體，望番後面咖啡色嘅建築物，就係螞蟻嘅屋企喇。真係幾大㗎！」

フワフワエッグ（烚蛋，或者應該叫做水煮蛋，江戸時代嘅菜式。望落真係好似，而企上去嘅感覺仲似！係一張有空氣承托嘅超大彈床。）

「原本我都好鐘意行上行落，但隻蛋嘅感覺好奇怪。彈下彈下，橡膠地面有震震下嘅感覺，再加上好多人跑上跑落。一向小心嘅我，當然避之則吉。」

「轉個頭，有個好似箭豬咁嘅地方。」

うねりの大地（波動的大地）

「一支支好似雪榚筒嘅物體，啲哥哥姐姐成個人瞓落去都得！我又當然唔敢上啦！」

「後面仲有個水池。見好多哥哥姐姐走落去玩水。有啲著住底褲，有啲乜都冇著！醜怪…」

「呢到真係有好多野玩。如果戰隊成員到齊，一定可以一齊征服呢隻蛋黃！」

「之後就犀利啦！我捉咗媽咪陪我去滑超巨型滑梯！好刺激呀！」

溶岩すべり台（溶岩滑梯。石造嘅滑梯，速度唔算太快。下面有個沙池，非常安全。）

（小朋友自己玩的話，要戴頭盔。咁就更加安全！全部自助形式，並且係免費。）

「太陽伯伯越升越高，周圍越嚟越熱。媽咪提議去室內玩。呢到有好多顏色，搞到我要唱番首《Rainbow Song》助下興。」

虹の巣ドーム（彩虹之巢，除咗有冷氣之外，置身喺呢一個色彩賓紛嘅環境，真係好似去咗個夢幻王國一樣。）

「我見啲哥哥姐姐可以爬入啲網入面。有啲就抱住個大波波搖來搖去。而我咁小心，推下個波已經好好玩。」

「玩咗成朝，其實都唔覺肚餓。但爸爸話佢個肚打晒鼓，又話血糖低見頭暈，咁唯有當陪下佢啦。有麵麵食呀！」

「雖然只係公園嘅快餐廳，啲野都幾好味。爸爸食咗個咖哩飯，佢話辣得嚟都幾好食。食完之後，爸爸推住我行來行去，叫我瞓一陣。佢真係當我傻嘅咩！有咁多野玩，點會瞓得著喎！於是，我要佢帶我返去螞蟻屋企玩。我自己滑咗一次滑梯，真係好刺激呀！之後番到餐廳門口，媽媽又抱住我行來行去，最後都係瞓唔著。於是，我地就去咗個大草地。」

 ローンスタジアム（Lawn Stadium，6.8 公頃嘅超大斜坡。有三分一個維多利亞園咁大！）

 「個草地大得好緊要！我問咗一位哥哥攞咗個大波波嚟玩。可以坐上去玩又得！仲可以推到上山頂，然後推落嚟！好得意㗎！因為山頭有好多人，場面都非常壯觀！」

（但相信最得意係見到契媽跑上跑落逗 Jayson 玩。哈！）

「玩完（契媽）之後，我地離開兒童之谷，去咗另一個地方玩。」

森のすみか（森林之窩）

「呢邊有啲似森林咁。有好多小路、吊橋、樹屋等等，真係好似喺森林有個屋企一樣。睇下我幾爽！」

「瞓媽咪真係好舒服！」

「呢到仲有木造嘅 Xylophone 玩！」

「仲有個小迷宮。啱晒我玩！但爸爸就爬得辛苦啲（因為佢肥…）。」

切り株迷路（殘幹迷宮（直譯））

「玩到筋疲力盡之後，我就同意走啦。行去巴士站嘅途中，我不知不覺間就瞓咗。爸爸好似仲瞓得快過我…」



~ Lindberg

P.S. 因為我地星期日去玩，所以好多人。如果少人啲，相信 Jayson 可以玩得仲多啲耐啲。真係要多謝親家奶奶嘅好介紹！呢個公園真係好啱小朋友玩。