北海道親子之旅：行程篇（二）

Day 4-5：美瑛、富良野

住：Pension & Restaurant La Collina
遊：當仲回味緊前一晚嘅法國菜，喺民宿又食咗個豐富早餐。之後，我地就喺民宿四周影相。對於一班城市人嚟講，一切都好新鮮。

之後，我就開住戰車，去每一個景點。景點都有唔少個，而且好散。如果自己冇車，都幾難去。

我地去咗：哲學の木、四季彩の丘、新栄の丘展望公園、Christmas の木、北西の丘展望公園、Mild Seven の丘、及 ぜるぶの丘（順手遠看 Ken & Mary の木）。中間仲去咗搵親子の木，但係搵唔到。係唯一一個衛星導航系統帶我地去唔到嘅地方。

天色唔係太好，不過每個景點好靚！有啲係一顆好靚嘅樹木，有啲係花田、草地、拍過廣告嘅景等。四圍搵啲花花樹樹，呢啲係唔係就叫做：「尋花問柳」呢？

但我地對影景冇乜研究，唔係太識影。其中 Christmas の木，我仲懶到「一腳」伸咗契爺落車，叫佢影就算數。哈！

午飯於千代田牧場，食肥美嘅和牛！我之前冇諗過有和牛食，所以食得好開心！Jayson 仲首次清咗佢個兒童餐！哈！

原本千代田牧場都幾多野玩，仲可以餵下動物。不過可能我地係「貴人」，個天勁落雨。所以我地乜都玩唔到。轉戰蜜瓜雪榚。

唔知係唔係雪榚嘅關系，個蜜瓜唔多甜。千二日圓一個，我甚至乎有呃遊客嘅感覺。

去到民宿，差不多係晚飯時間。意大利式晚餐由 6:30pm 開始，大約要食兩個鐘！對間民宿，起初有啲失望。因為地方冇之前嗰間咁得意。但食過佢份晚餐之後，我真係感動到喊。當我再睇真啲間民宿，我開始明白佢主人係一個乜野人。要對人客懷住一顆關切嘅心，先煮到啲咁嘅美食。如果人人都可以好似村岡先生咁，我就唔洗煩要統治地球啦。

原本第二晚，我地要去睇祭典，驚夜返，所以想叫村岡先生唔好煮我地飯。點知佢話如果我地 7:30pm 返得到嚟，都會煮俾我地食！喺未嚟日本之前，我都以為呢餐冇乜野大不了。但食過第一餐之後，我點都唔想錯過另一餐。所以非常非常非常感激村岡先生嘅安排。

第二日，食過早餐之後就去富田農場。四周圍都係薰衣草味，感覺就好似入咗個大廁所一樣。隻味用得太濫啦！

除咗啲香味之外，都幾失望，因為好多花都開始謝。但總算個天冇落雨，已經算對我地不薄。影咗成朝相，就喺嗰到食一個輕便午餐，仲有薰衣草味軟雪榚、薰衣草味咖啡、薰衣草味波子氣水、同一條三百日圓嘅超甜粟米。

留住 1/4 個肚，我地就去大橋車厘子園食過飽！但點知…

唔好食！我有兩個結論：1) 日本啲車厘子本身冇美國嘅咁甜咁濃味；2) 好食嗰啲仲到你任食咩？！不過都好好玩。我都唔知原來啲車厘子樹係咁嘅樣：

到咗 5:00pm 左右，我地就去富良野市，睇一年一度嘅富良野肚臍祭。都幾得意喎！

晚餐係另一頓感人嘅意大利餐。嗰晚有另一班港客，我地去到嘅時候，佢地已經食得七七八八。聽到佢地對另一枱傷殘小朋友嘅高談闊論，心諗好彩人地唔識聽，但都足以令同樣身為香港人嘅我感到羞恥。亦都因為有咁嘅人，我先要統治地球。唉…

（續…）



~ Lindberg