港童 x 工人

曾經有人問過，生小朋友係唔係一定要請工人，特別係指外傭。如果兩公婆都要搵食，只靠自己邊到搞得掂呀。如果有人幫手湊，或者願意俾人湊，可以放喺日間托兒服務所，咁當然唔成問題。但嗰個始終都係自己嘅小朋友。如果有能力，盡量都會希望自己可以參與番。如果俾我自己排次序，我會：

9) 日間托兒服務

8) 俾人湊

7) 嫲嫲湊

6) 婆婆湊

5) 工人湊

4) 嫲嫲幫手湊

3) 工人幫手湊

2) 婆婆幫手湊

1) 唔做野自己去湊

托兒服務唔係話唔好，有朋友都用得好開心，佢啲小朋友學到好多野、好獨立、會照顧自己，但個人意願，始終都想小朋友可以同自己親人一齊多啲。如果要老人家日夜湊，我覺得實在係太辛苦，佢肯我都唔想。嫲嫲排位比較差，因為大多數嘅情況之下，嫲嫲會縱小朋友。而且對男士嚟講，夾住喺婆媳之間，係一件落地獄般嘅差事。可以自己湊，當然係最開心。但我未中六合彩，唔打工又邊到有錢開飯呢？

所以一直以嚟，我地都依賴婆婆幫手。對於婆婆，我地都知道好辛苦。所以每日都盡快趕返屋企，食完飯就捉走 Jayson，等公公婆婆可以休息一下。每日嘅接送，雖然都幾吃力，而且養成咗 Jayson 夜瞓嘅習慣，不過見到 Jayson 可以喺我地可以控制嘅情況下成長，我地都好安慰。但自從婆婆跌親之後，我地就驚覺婆婆年紀大啦。知道婆婆辛苦，Jayson 又唔聽話，個心好難受。加上婆婆之後要照顧 Jayson 姨姨同快出世嘅表妹（已經出咗），我地真係急需搵人幫手。

其實之前都有請工人嘅打算，但係等 Jayson 三歲嘅時候。第一，起碼佢識得話俾我地知屋企發生咩事；第二，課外活動多咗，可以搵工人帶，唔洗婆婆辛苦四圍走。第三，亦都係最重要嘅原因，就係可以俾婆婆管教多一陣。我唔想有工人喺左近，幫我調校一個「港童」出嚟。但因為情況唔許可，就快快手搵個菲傭（下稱姐姐）過嚟幫手。

原本朋友嘅工人介紹咗個菲傭俾我。佢話佢現僱主對佢好差。我叫佢嚟我屋企，見過都還可以，做野都快手快腳。心諗就救佢出火海啦。點知到臨做手續嘅時候，佢話驚現時僱主，唔敢請假去驗身。如果妳都唔重視我呢個新僱主，咁妳都唔好嚟幫我喇。

依家呢個姐姐喺香港做咗三四個月。聲稱前僱主覺得同本身有嘅印傭唔夾，所以炒咗佢。佢係咁講，我係咁聽。見佢同我一樣大，應該真係有心嚟香港打工搵啲錢嘅。於是就立即叫佢喺香港驗身，然後返菲律賓等簽證。雖然寫晒信叫佢快啲批，最後都等咗差不多六個星期。（據我理解，請菲傭嘅程序係：驗身 > 領使館 > 香港入境處。前兩者大概要一星期，之後等入境處（唔知）搞（乜要）四至六星期。）

喺日本旅行嘅時候，我成日叫 Jayson 做「港童」。好彩佢識抹大便，否則成日依賴人，又自我中心，真係十足十一個「港童」。返到香港之後一日，姐姐就踏入我地屋企。第二日，Jayson 就打姐姐，咁佢仲唔係「港童」？！天啊…

呢個新生活，我相信大家都要啲時間去適應。

（待續…）



~ Lindberg